樂壇新人康堤 (CONSTANCE) 在備受矚目的目光下出道，這次撇開身份，看看她另一個標籤：04年出生的GenZ。人人說GenZ重視自我，追求自由，在音樂方面，康堤似乎也符合這個特質。寫歌對她來說，首先要好玩，亦希望透過音樂connect聽眾，交換能量。面對負評，她會自我懷疑，但也提醒自己，開心最緊要。

採訪：林三 @lam.three、Heidi @heidi.is.strong

攝影：Andrew @andrew_bangchan

設計：ZH @zzzzzzzih_

康堤日前推出第一首廣東話新歌《一律建議分手》，找來了黃偉文填中文詞。這首歌說的就是她的個人經歷：剛出道那段時間，身邊的朋友剛好都有感情問題，常常打給她傾訴。但當時她自己也有很多煩惱，於是這個情緒垃圾桶就要爆炸了：「覺得好煩⋯⋯不如分手啦，你哋全部都咁多問題（笑）。」心情煩躁，就寫了首歌發洩。要說這首歌在講甚麼道理，可能就是鼓勵大家勇於發洩：「It’s okay to let it out，即係你好大壓力嘅時候，好多人搵你傾偈，但你自己又其實有好多煩惱，你都可以大膽去發洩呢啲感受。」

｜家人教落要做自己

出道才三個月，有時走在街上有些人會認得她，找她合照，「我就會嚇一跳，『吓？同我？你係唔係認錯人？』」有人讚她的歌好聽，她也會感到興奮。當然，有讚美也有批評 ，網上總會見到一些負面評論。年紀輕輕，唔介意就假，「當然有啲唔開心，其實我會畀啲comment洗咗腦，我見到佢話『你唱歌好一般』或者『首歌唔好聽』，我都會聽聽吓覺得，又真係好似幾一般，幾唔好聽。」

幸好年輕人代謝快，情緒快來快去，低落一兩天，隔幾天又沒事了。這種能力，也許是由家人培養出來。家人常跟她說：「你唔好理佢哋講啲乜啦，真係做自己，你自己開心就好。同埋你而家做緊啲好新嘅音樂，可能未必大家都咁快會接受到。」爸爸陳奕迅也是過來人，跟她分享親身經歷：「佢話自己以前開頭，睇到啲comment，佢話佢都會特登買啲雜誌嚟睇。嗰時我就覺得：嘩，佢原來細個其實都會咁做，覺得好感同身受。」兩代人多了一種共同經歷，也互相理解多了，「之前可能我平時好少會畀佢哋聽我唱歌，所以出咗啲歌之後，佢哋會突然間行入嚟同我講：『真係好cool，好好聽』，不停send畀朋友。跟住我就：嘩，我冇諗過佢哋會咁開心，或者覺得我做嘅音樂咁正。」

｜寫歌希望Connect人

康堤目前推出的兩首歌，她都有份參與曲詞創作。自12、13歲開始，她有時放學回家彈琴時，會隨性地哼一些旋律，錄voice memo，兩年前開始認真寫歌。她聽歌聽得很雜，音樂人由五十年代的 Frank Sinatra、七十年代的 The Carpenters ，到香港八、九十年代的關淑怡、梅艷芳、王菲都聽，塑造了她多元的音樂品味。

新歌的風格，在香港主流樂壇來說算是比較另類。她說，做歌的時候沒有特別想著要做主流的canto pop，旋律走向很直覺地偏向了歐美風格。做音樂對她來說，首先是要玩得開心，亦希望勾起大家的共鳴，所以寫歌靈感都是來自親身感受，「可能係分手，我會用我自己嘅觀點去寫首歌。我希望佢哋會connect到，會覺得 you are not alone，我同你share我嘅感受，我覺得係一個energy嘅互動。」

像這次新歌，也是在connect一些不懂say no的人。在歌中強勢叫人「感建分」的康堤，現實中卻是個慣性討好的人，很多時她會先遷就別人，有時卻會被人挑戰底線。她用這首歌教人say no，尊重自己的底線，「你應該保護自己嘅energy，其實係要先錫自己，先可以錫人哋。一定要尊重自己。」GenZ妹妹康堤叫你，一律要self love。

Hair Stylist：Keith Wo

Makeup Artist：Heisan Hung

Wardrobe Stylist：Hilary Tsui