疫症大大革新咗整個世界嘅運作，收窄去到個人層面，人類嘅生活行為同模式都出現咗好多變化，例如運用時間嘅方法同優次。當劇場同博物館等文化場地全面封閉期間，唔少觀眾都係Disney+加Netflix長伴左右，餓咗Live Show良久都矢言等到場館重開，必定蜂湧入場、報復睇騷；然而當一切復常、機會重臨時，上述嘅畫面又似乎無出現到，原因眾多：淺層嚟講，市面上唔同類型嘅活動都一次過返晒嚟，單係唔少藝團同創作人都要追番落後，觀眾時間又無明顯多到，僧多粥少之下必然有嘢遭到割捨；拉闊少少去睇，中間可能仲牽涉到一啲價值判斷，當一啲嘢失去咗，之後我哋可能更加珍惜，或者覺得無咩可惜，到底重入劇場係屬於前者，定係後者？

早前機緣巧合地受到劇場朋友嘅邀請，喺太子一個獨立運作嘅文化藝術空間參加咗一個劇場作品嘅「試玩」，點解係「試玩」而唔係「試演」呢？因為呢個作品入面，係唔會有專業或者業餘嘅表演者演畀你睇，成個場地只係得我同另一位參加者喺度，兩個素未謀面嘅人跟住指示去做啲嘢，於是乎我唔再係入到場搵個位，繑埋雙手去睇跟住有咩發生，有咩發生都完完全全在乎於我同對面果個人嘅造化。

會唔會好無聊？創作團隊真係扭盡六壬，喺提供俾參加者嘅指示入面放滿咗巧妙嘅設計，容讓呢兩個陌生人喺非傳統劇場嘅空間入面相遇、相交，然後相識、相知，過程中當然係受到指示嘅引領，但係框架本身係好開放，就算兩個完全相同嘅人，都無可能創造得番完全一樣嘅經歷，而且一日未離場，一日都唔會知道最終會有咩事發生，繼續行落去嘅吸引力係極之大；即係有咩好玩？如果你係追求一個被動式嘅觀賞活動，想喺有距離嘅狀態有嘢睇下，你就唔好考慮入場，相反如果你個心係夠開放，想試下花大約一個半鐘頭投入落一個新空間、一段新關係入面，你睇到嘅遠遠唔單止係對面果個新朋友，更多更多其實係你自己本身。

呢個講又唔易講，聽落亦未必即時理解得嚟嘅作品叫係《千方百計》第二部份：相遇（A Thousand Ways Part Two: AN Encounter），係由美國劇團600 Highwaymen喺疫情期間創作，聚焦喺孤獨同分離，最特別嘅係點樣修補社會上因立場而導致嘅關係分歧。香港版本嘅翻譯同戲劇構作陳泰然就話，喺疫症期間，美國內部除咗隔離，亦都因為各類型政治同價值觀問題增加咗人與人之間嘅距離，「當了解到創作動機，我們認為這種社會分裂不只於美國，而正於世界不同地方發生，亦包括香港。此時正好讓我們回想，這些距離是如何產生，也如何能夠修補。」

相對於傳統劇場，《千方百計》係喺近年新成立嘅獨立文化藝術空間小田工作室發生，創辦人李漢廷指出，小田工作室一直支持主流以外嘅劇場形式同美學探索，「本地劇場脈絡而言，比較實驗性、或受眾群較少的作品，也許難以得到正式場地支持，或文化機構的藝術空間資助，而小田工作室則希望以獨立營運的駐場、創作及展演空間讓所述的作品發生，從而增加本地劇場作品的多樣性。」

呢個作品每次只可以容納兩位參加者，可以想像到名額係極之有限，去到執筆呢刻，聽講正場已經爆晒，再額外加開咗少少場次，如果你有少少心動，或者真係需要千方百計咁去搵飛，祝你好運。