股市最近幾日跌到死去（但無）活來，聞者傷心，聽者流淚，最慘嘅係探底工程永無盡期；如果想搵啲開心嘢分散下注意力，睇戲可能都係唔錯嘅選擇，事關近日有套香港電影史上最賣座嘅喜劇上映緊，票房已經突破咗7千萬元，而且愈上愈有，作品無刻意扮高深，亦無大玩屎尿屁，簡簡單單回歸到人倫關係嘅基礎單位—家，當中主要嘅場口同橋段都係一家人喺屋企行出行入，同埋食飯，然而簡單並唔等同容易，將一幕幕尋常不過嘅日常生活寫成、演成同拍成直搗觀眾心靈嘅電影作品，絕對唔係等閒之輩可以做到。

相信未講到個戲名，廣大讀者都已經知道呢套就係《飯戲攻心》，由陳詠燊同時擔任編劇同導演，六人主演陣容包括黃子華、鄧麗欣、張繼聰、王菀之、林明禎同陳湛文，一次過寫晒七個人嘅名出嚟，並唔係為咗要充撐字數，而係呢個組合基本上每一位都各擅勝場，近乎缺一不可，觀眾值得好好記住佢哋；電影嘅名字係一種好港式嘅「食字Gag」：飯氣攻心本身係生物反應，食飽飯好易就會想瞓覺，然而呢套作品幾乎係全無冷場，相反好幾場飯戲都係精彩絕倫，無論係家人同心、其利斷金，抑或係各懷心事、表裡不一，果種描繪塑造都係相當深刻生動，令人睇得好入心、好上心。

《飯戲攻心》嘅好係全方位嘅，首先劇本應記一功：由一味死撐要頂住頭家嘅大佬，到飄洋過海追星嘅宅男女神等等，每個人物嘅個性都好立體有力，分開睇係各有各嘅故事，擺番埋就另有火花趣味；人物之間嘅相聚別離，富有戲劇性嘅同時又唔會太堆砌突兀，觀眾既覺得呢一家係打開隔離屋果度門就見到嘅平常人，又唔會嫌棄家庭事平淡如水無戲好睇，普通中見不普通，實在唔係普通水平嘅創作可以輕易做到。技藝再高，作品都唔一定能夠叫好叫座，好多時仲要天時地利人和嘅配合，為香港人而拍嘅《飯戲攻心》係絕對值得爆紅嘅。

電影嘅「港味」唔係純粹嚟自戲名嘅「食字Gag」，或者編導演組合中八成六嘅港產成員代表，作為作品命題，《飯戲攻心》講緊嘅「家」，首先當然係三兄弟，加上佢哋三位女伴嘅微觀人際關係，六個人一間屋，一齊住好似就係一家人，賣咗間屋彷彿就係家不成家；同時更加宏觀地睇，過去，大家一直紥根喺同一個地方，現在，隨住經歷同際遇嘅唔同，彼此有啲唔同諗法，有人想撤離開展新生活、有人想留守繼續行落去，未來，「家」，到底仲喺唔喺度？優秀嘅作品往往都係去拋出重要嘅、切身嘅問題，刺激觀眾自己思考，而唔係要你去硬接創作團隊嘅價值觀，於是直至劇終字幕（仲有NG片段）徐徐升起，編導演都無意圖去提供一個標準答案；最後，眾人揀咗一條「打開門，行出去，去遠啲」嘅路，親情到底因此係濃咗定淡咗？屋企究竟係喺門內定門外？真係睇你點睇。未睇？咁就應該快啲睇！