當機會來臨，你會如何選擇？一位年少時愛看宮崎駿、美少女戰士，喜歡Kawaii的插畫家，以畫兒童向插畫為主要工作，偶然參加了全球首個數碼藝術極限挑戰賽LIMITS，最後成功打入亞洲挑戰賽總決賽並登上冠軍寶座，憑藉的除了純熟技巧，還有一絲衝動！

「HOKO-怒魂」 —— 取名自HOng KOng，傳說在四月的第十一天「木棉花日」出生……這隻可愛的三色小貓，出自插畫家Mankee手筆。她過去曾從事產品設計，亦因畫風偏兒童向，有為教育機構畫繪本。與不少插畫家一樣，她偶爾會擺擺市集。2020年，HOKO誕生，Mankee期望透過HOKO說故事，同時治癒港人。工作、畫畫、市集，諸如此類的日常不斷重覆，直至2022年初，她認識了LIMITS，在朋友慫恿下報名參加，又通過了香港區的決賽，贏得了赴日參加總決賽的資格。

Mankee在朋友慫恿下報名參加LIMITS，最後成功奪冠。

兒童向畫風很療癒！

//參加比賽首戰即獲勝//

就是如此，Mankee帶着輕便靈活的「武器」 —— iPad，膽粗粗出戰日本。LIMITS的賽制很簡單，參賽者隨機抽取一個關鍵字，於20分鐘內完成電繪，4名評判根據「創意」、「技巧」、「表演力」評分。比賽採一對一淘汰制，擊敗其餘7名分別來自日本、新加坡、台灣和香港的地區代表，便算獲勝。首次參賽就成功奪冠，她憶述，自己的「表演力」得分不高，而致勝關鍵與畫繪本不無關係，「過去出繪本，都係要快，學識諗清楚先動手。」

自言由細到大「冇乜老師緣」的Mankee羅列得獎感謝名單，阿哥佔一席位：「第一部電腦有photoshop可以用，係佢畀我用，人生有咩高高低低，都係佢去救我，好多嘢都係佢關顧我」；工作上遇上的CD（creative director）亦是一位貴人，「係一個西班牙嘅女仔，合咗咗5年」，除了技巧上的教授，更難得的是信任和鼓勵，「佢畀好大空間我發揮，去日本兩星期（比賽），佢聽完我講，即刻就畀我去。」

//學習緊令成年人有嘢攞走//

速繪比賽於5月已經圓滿結束，事隔數月，經過一輪的忙碌和沉澱，Mankee生活亦回到正軌，「依家開始畫番之前冇時間畫嘅畫，做自己想做嘅嘢。」甚麼是「想做嘅嘢」？Mankee回港後租了一個工作室，作更多不同嘗試，「依家叫做圓咗個希望做freelancer嘅夢，打咗咁多年工，星期一至五都冇時間。」比賽後的一大project，是出版屬於自己的繪本。新繪本定名為《HOKO與木棉小精靈之「一起走、一起找」》，已於10月正式推出，內容繼續以HOKO做主角，用香港作背景，希望為小朋友帶來正面訊息。

Mankee回港後租下了新的工作室。

她笑言過去的插畫以開心為主題，欠缺深度，但經歷了社會變遷，她除了「畫啲嘢令人開心之餘，亦學習緊令成年人睇係有嘢攞走」，希望能不斷進步，透過新繪本「做啲有意思嘅嘢。」讀product design的她續指，「經過呢一、兩年，你會有啲嘢想講，但要用一啲方法講到，而又令人睇得舒服」，這些技巧，涉及如何用圖像溝通，「我冇讀過visual communication，啲讀VC嘅朋友，你睇佢幅畫，加埋少少description，就會明白佢想表達嘅意思，好勁。」

//改變源於唔想後悔//

香港近年的變化，不僅帶來了繪畫上的反思，亦是她敢於參加速繪比賽的最大原因，「係呀，兩、三年前我唔會參加呢個比賽，繼續打呢份工，平平穩穩就OK。」Mankee直言，過去的她即使有事情想做，也常常採取拖字訣。經歷令想法徹底改變，她認真地說：「呢兩年加埋COVID，生命都掌握唔到，都唔知下一秒會點，唔想後悔！」

實體化HOKO，依然Kawaii。

訪問尾聲，老土問題，有何勉勵說話？充滿正能量的Mankee表示：「有機會就去嘗試，同時要鍛鍊自己，等待right moment，即使環境再差，希望都可以堅持，唔好放棄！」

//後記：插畫師的小心願//

除了Mankee的發展，訪問也談及了業界現況。Mankee笑指透過今次比賽，認識了不同地方的選手，讓她眼界大開，「佢哋好勁，有幾個係CD，有啲係freelancer，會教班，我哋兩個香港嘅（比賽亞軍Rosine Wo亦是香港代表）好初哥，冇乜經驗。」筆者好奇，香港與外國的插畫界有何分別？她指，外國習慣共享資源，插畫師會互相認識，香港較少這些機會，創新活動也不多，「慣咗做嗰樣嘢，就成日做嗰樣嘢。」

作為其中一位帶領香港衝出國際的插畫師，Mankee的小心願是：「想識啲唔同嘅插畫師，多啲交流，多啲art jam啦！」

LIMITS在日本舉行，奪冠的Mankee可謂代表插畫界衝出香港。