即將在本月27日於九展Star Hall開show的Jason和Sophy，過往交集不多，以為訪問現場會偏向沉悶，誰知對答默契十足，陳伯認真解釋自己「長氣」原因，而外表cool到爆的Sophy更即席搞gag，至於好唔好笑，就等你畀分！

//例牌題目：「你覺得佢點呀？」//

Sophy本身以為Jason好有前輩架子，接觸過後發現親和力高、是個暖男爸爸、有耐性、喜歡與人聊天，「本身以為佢會『係』、『唔係』，好cold咁。」

Jason接過話題：「我係好鍾意解釋㗎！」他立即發揮長氣本色，解釋點解鍾意解釋：「每個人嘅interpretation都唔同，你用得越多唔同嘅方法去interpret你諗緊嘅嘢，人哋就會理解得越多、越仔細你對一樣嘢specify嘅諗法。」

//Jason的長氣//

Jason繼續解釋自己的解釋：「畀幾個字你，每一個人都會有各自嘅interpretation，就係透過一啲elaborations去分辨仔細嘅分別」。他表示：「我唔認同當你好明白一樣嘢嘅時候，你就可以用一個好簡陋嘅方法，去講佢出嚟。」

對於Sophy的認識，他亦用他的方法去「解釋」：「佢prefer奶茶over檸茶、prefer雞全翼over雞髀、鍾意日本多過泰國、鍾意冬天多過夏天、鍾意海多過山。」至於性格，他的評價是：「合理，合理係一個好高嘅評價嚟㗎！」

//Sophy的幽默//

雖然音樂會未開show，但是他們已經在某件事上擦出火花 – 搞爛gag。以為Sophy好cool？原來擁有一顆幽默的心。她對Jason的評價是：「佢都有啲幽默位，喺爛gag界別嚟講係好笑嘅，我鍾意嘅。」她補充：「我今日有覺得（幽默感）被get到，我好榮幸我嘅幽默終於畀人見到。」

話口未完，Sophy立即搞gag，問到最想唱Jason哪首歌，她說：「最近我有個MV有架開蓬車，想去學車，咁就唔使拖車，所以我想唱 – 《車匙》，我想『手中緊握車匙』。」

Jason接力：「我仲有首歌叫《Jeep》㗎其實！」
之後二人的對話是……
S：「no我要BMW」
J：「車匙都冇講係咩車匙」
S：「所以咪由我決定囉」
J：「手中緊握單車匙」
S：「唔得，手中緊握跑車匙」

//另一例牌題目：「對合作的期望是？」//

以上爛gag，好笑與否見人見智，兩位都是唱得之人就不用懷疑。一直一手一腳做音樂的Sophy，渴望透過不同的合作「打開自己嘅宇宙」，學習更多。而先後與Kiri T、Serrini、Novel Fergus合作過的Jason，直言喜歡與年輕音樂人作不同嘗試，希望「roll with the flow」，在過程中有喜出望外的得着。

拍照期間，Jason自顧自走到康樂棋桌認真解釋玩法，Sophy在傍配合一齊玩，尾聲，他們又轉移陣地打乒乓波。陳伯貪玩，原來Sophy都可以好貪玩，訪問現場的chill and fun，會否在《我是現場》音樂會005重現？期待！

我是現場 音樂會 005【陳柏宇 & 王嘉儀】
日期｜2022年8月27日（星期六）
時間｜晚上8時正
地點｜九龍灣國際展貿中心匯星 Star Hall

Jason
Wardrobe : Public Tokyo, N.HOOLYWOOD
Stylist: Kay Pang
Hair : Aki@The Attic
Makeup: Jessica Chan

Sophy
Hair: Toyo
Makeup: Hana Ho @ Hana Makeup Studio
Outfit: Manuri from FARFETCH
Emphasis Jewellery