改編自《Little Shop of Horrors》，2002年中英劇團的音樂劇《花樣獠牙》首度公演，好評如潮。故事內容荒誕且誇張至極——憨直小子偶然得到一朵世間罕見的奇花，怎料奇花嗜血，為了養活這朵給予他好運的花，小子一步步踏上了不歸路。盧智燊（Edmond）當年飾演變態牙醫，雖不是主角，但憑此劇勇奪第12屆香港舞台劇獎最佳男配角（喜劇／鬧劇）。對於他而言，這個劇本是他仕途轉捩點。

20年後，Edmond已蛻變成中英劇團助理藝術總監及導演。他提出，不如再次把此劇目搬上舞台？

重演念頭一起，他已經鎖定了其中一個男主角人選 ——袁浩楊（魚旦）。盧智燊形容，《花樣獠牙》感覺很cyber punk，很漫畫化，「或者我哋叫荷里活B級片，有怪獸、有驚慄、有搞笑……」，角色發揮空間大，但很容易失真。袁浩楊加入中英劇團6、7年，是首次擔正音樂劇男主角。盧智燊覺得，這次他ready了。

於是，這一種子，種出一株長滿獠牙的奇花，以及一個跨越時代的劇本——既是盧智燊的在舞台生涯的紀錄，也見證袁浩楊的自我突破之旅。

文字：Heidi @heidi.is.strong
攝影：Cheryl
設計：Po @p12_o28

｜盧智燊：從戲劇找自由 演戲「要當真」

盧智燊在1998年加入中英劇團，與當時的導演李鎮洲亦師亦友，深受其啟蒙，「但起初入去嗰3年，通常都係做4、5線角色，但佢無放棄我，不斷推動我。」到了第四年，盧終於獲得了《花樣獠牙》中牙醫史諤仁一角。

牙醫這個角色，不是主角，沒有主線劇情，但卻是構成這部舞台劇「夠癲夠喪」的重要一環。「因為佢係變態，但你又唔可以太變態，因為太變態唔好笑。佢要將自己快樂建築喺別人嘅痛楚同尷尬之上。唔能夠太瘋狂，但又唔能夠太現實。」當年盧智燊為角色自行添加了很多小動作，例如瘋狂的笑聲，「你要喺舞台上搵到嗰種自由」，盧智燊說。

角色的癲喪與過度浮誇，可能只是一線之差。的確，盧智燊當年亦陷入了「風格化」的漩渦。「我記得我只係打一個乞嗤先繼續唱，導演嗌咪，問你可唔可以真啲呀！的確，我哋好容易因為風格化、漫畫化，令到件事假咗。就算風格化都好，入面都要係真。」

得到如此角色，發揮空間甚大，但壓力亦隨之而來。當年李鎮洲給予他很大的信心。或者這亦正正是他決定重演這套劇目的原因：「呢套戲對我嚟講好大意義，除咗係我演藝生涯好重要嘅轉捩點，佢亦係好好嘅種子，好適合依家呢班年輕人。」

時至今日，從演員變成導演，而且是導一齣自己曾經演出過的劇目，會否會不自覺地想控制演員按自己方式演出？盧智燊笑說，10年前的自己或許真的會這樣，但現在看到飾演牙醫的蘇振維，演繹方法與當年的自己是完全不同的兩種風格，「都work㗎喎，都好好笑喎！後來我都明白咗，就算100%照抄我都好，都唔代表係好。」

｜袁浩楊：七年磨一劍

22年後，在排練室內賣力揮灑汗水跳唱練習的，不再是盧智燊，而是眼前這班新力軍。飾演男主角歸世茂的袁浩楊，樣貌有點稚氣，但原來2018年已加入中英劇團。盧智燊在構思重演時候，腦海中已經選中了他：「覺得佢唱到，性格適合、外型適合，信心都似乎build up到OK了，所以，覺得係時候了。」袁有點靦腆道：「第一次擔正musical嘅男主角，奉獻咗畀盧智燊，同埋中英。」

盧智燊與袁浩楊的關係，恰似當年李鎮洲與盧智燊一樣，他們曾經一同露營、一同通宵吹水。盧智燊曾見過袁浩楊剛加入中英之時，排練其他導演的劇目，因為太緊張「淆到痴咗線，棟咗喺度」盧智燊用露營比喻：「做主角唔容易。好似一個營嘅主骨，唔夠力開花，你有幾多條骨都會散。所以，要好有自信，好有信心。」

在《花樣獠牙》裏，歸世茂表面是一個憨厚傻小子，但袁浩楊認為他的經歷絕不簡單：「Act 1嘻嘻哈哈，畀人笑畀人打，但去到後來知道心愛女生有好慘痛經歷，經過嘅掙扎、殺哎呀阿爸，全部都係真。」經歷過這些年的磨練，袁浩楊學懂了——用心感受角色，又刻意阻止自己重看20年前演出片段，「怕畫面停留喺自己腦海，局限自己，停止自己探索。」

最後，盧智燊驚訝：「魚旦演繹出嚟嘅情感比我想像中更deep。」

｜重演：文本變化與挑戰

經過22年，時代轉變，社會轉化，劇本需要修改。根據陳鈞潤先生當年的文本翻譯，劇目時代背景明確是5、60年代的香港，但重演時候則修訂得比較模糊。盧智燊解釋：「例如Audrey（女主角）有句歌詞，講希望『我賢淑似林鳳』。但大家依家都唔知邊個係林鳳，咁有乜意思？所以我改咗啲詞，令年代甚至地域模糊咗。我覺得for年輕人，佢會容易啲進入呢個世界。」

改變的除了語言，還有科技。盧形容自己「捨易取難」，除了有一棵比7人車大的奇花「珂珠二號」，這次劇組還把Art Tech融入舞台設計上，「我哋用幾個大遙控摩打，結合大LED螢幕同埋影片，條街可以好似左右咁pan來pan去，真係好似有一個視覺錯覺係你攞住鏡頭移動咁，帶你去睇呢個故事。」另外，製作組還設計了沉浸式音效，「喺觀眾席圍住個喇叭，好似真係有啲嘢包圍你咁，增加觀眾嘅投入感。」

｜跨時代閱讀劇本——講一個貪字，老土但永遠受用？

22年前與22年後，社會又應該如何理解、感受這個劇本？

盧智燊為了更好地並投入《花樣獠牙》這個劇本，特意在網上看了很多有關奇案的資料，發現原來不少倫常殺人案，「最初原來都只係想呃少少錢」。盧說：「貪婪呢件事，好老套。可能你會話，又講？但你有無試過偷錢？有無試過偷阿媽錢？扮病射波？偷公司膠化？偷A4紙？每個人一定會有一點點貪心，但越來越大，小種子就會引誘你，一發不可收拾。」

而在表達手法而言，他認為22年前整件事「輕啲」，「可能會當係娛樂豐富嘅音樂劇、好睇嘅show」。但今時今日，盧智燊更希望大家看此劇時，可以更加感受到深層次的意義，「唔好以為呢個係一個隔岸觀火嘅故事，希望大家真係會感受到貪婪，真係會好似食咗你咁。」

誠如劇中那句歌詞——

In ACOO, you can see #ACOOPerson.

#花樣獠牙 #中英劇團 #舞台劇 #音樂劇 #香港舞台劇 #香港音樂劇 #葵青劇院