【頂硬上】脫離唱片公司成獨立歌手 JACE陳凱詠從搏盡無悔學會放過自己 「能夠接受呢份脆弱，都係一種堅強。」

奧運期間，社交媒體上流傳笑話一則：「香港人OT一定唔會輸！」高壓環境，即使資源不多，人們都十分擅於憑雙手創造奇蹟。卻，偶爾也會爆煲。女歌手JACE陳凱詠笑言初出茅蘆時，家人曾約旅行，她卻說：「去咗旅行有啲job搵我，我做唔到咪好唔抵！？唔得㗎。」當紅時，工作邀約如雪花般飛來，即使被公司雪藏的一年，JACE也不打算讓自己停下來，「瘋狂上跳舞堂、練唱歌，包括我自己去旅行，都係抱住要去學唱歌跳舞嘅心。」卻發現不論怎麼努力，也做不到別人那種泰若自然的感覺，她才驚覺和接受了當下的情緒：「發覺我根本唔開心，我都唔錫自己，我點跳到出嚟啫？」 這一年，突然脫軌的生活使她徬徨至極，那些無以名狀的傷痛蠶食了靈魂：「手震，然後口啞啞，開始流眼淚、心跳好快，講唔出嗰啲係咩嚟。」鎂光燈之下，以獨立歌手之姿回歸的JACE依舊亮眼，但她不想再埋藏光鮮背後的掙扎、看似勇敢下的脆弱 —— 於是，找來蘇道哲作監製、謝芊彤譜曲和陳詠謙，以曾經讓她感到世界末日的《隔離》曲風ballad，寫下一首記錄自己憂傷、無助和迷茫的《間歇性休眠》，JACE以釋懷的語氣說：「能夠接受呢份脆弱，都係一種堅強。」 採訪：實習記者Janet、Hoiyan 文字：Hoiyan @seamouse_hoiyan 攝影：Andrew @andrew_bangchan 設計：Owen @wai.ho.98 ｜見習獨立歌手 今年，JACE推出了一首舞曲《百妖夜行的修行》，還有一首抒情歌《間歇性休眠》，兩首歌也以蛇作發想，卻是不同狀態下的蛇，她笑着解釋正喜歡這種動物的深不可測：「佢有攻擊嘅時候，冬眠就變成一個餅捲埋唔郁，我鍾意呢種極端性。」要數自己最像蛇的地方，就絕對是慢熱和後知後覺，她比喻：「蛇吞咗隻象，要慢慢消化，原來咁難消化！我做咗獨立先，哇！好惡啃喎呢壇嘢，我依家都feel緊。」 成為獨立歌手，必經過程是一個人由零開始建立屬於自己的團隊，JACE認為這是孤獨的：「要花好多氣力去慢慢遇見一啲人，完成一啲事，冇人同你去分享。」而且，所有的成敗得失全掌握在手，沒機會再把責任「嫁禍」給別人，讓她也收起了一些任性，「最困難係點樣擺自己喺個世界入面，冇人話你㗎，如果我鍾意放飛、同世界脫軌呢？係可以嘅，但會有一個consequences，你要自己承受返。」除此之外，在創作上不就很自由？「唔會㗎，所有自由都有代價。」現在，有了創作的雛型，她需要尋找不同的人協助完成作品；從前，為了做好一首作品，JACE需要不斷說服公司，好讓他們相信自己的觸覺和判斷，死守把歌曲變成自己想像中的模樣。 ｜#天生倔強 時光倒流到幾年前，JACE笑言除了公司任務《隔離》外，當時每首歌也花盡無數力氣，只為爭取自己喜歡的歌，以及守着歌曲為自己喜歡的模樣，她以新人年後的第一首歌《天生二品》為例，憶述公司評價：「呢首歌唔好聽，唔會有人記得，我哋唔會做電台宣傳，無謂嘥錢嘥力，你等下首啦。」聽罷，JACE就像被潑了一身冷水，過熱的頭腦直接當機：「下？點解呀？我鍾意呢首歌！」山不轉路轉，既然公司已鐵定心腸不做宣傳，她便自己想了一個小企劃，邀請朋友一起發布童年照片帖文，並標籤天生XX（自行填寫），再找朋友一起製作社交媒體的濾鏡，JACE沾沾的說：「嗰陣其實未咁興用filter做宣傳添㗎！我都算幾前！」在她奮力掙扎下，《天生二品》掘起，成為了JACE歌手生涯的第一首五台冠軍歌。 在生活和人際關係上，JACE直言也不太信任自己，但從小到大在創作或藝術觸覺上，她從來不曾懷疑自己，她以童音分享：「細個着衫，我覺得呢件衫一定係咁樣襯半截裙，我就唔理媽咪，唔知點解細個已經好肯定。」正如《百妖夜行的修行》，初時的概念有蛇、voguing、古典傳說和中樂聲音，她笑言應該沒有人看透自己正在捏的餅，但：「我唔理！我要做！」 ｜燃燒生命級別的搏盡無悔 被雪藏的那年，JACE的人生就像「死save的檔案」，亂作一團糟，她說：「香港好似工作斷定咗生活好大部分，所以好容易因為工作嘅節奏變成生活節奏。」沒有工作，怎麼辦？所有不安、焦慮的情緒泛濫湧至，她卻嘗試強迫自己繼續壓抑，這樣的反彈只會更大，最終情況更失控，「呢啲係咪抑鬱呀？呢啲係咪狂躁呀？如是者半年，我覺得唔得，我要去個旅行。」便出發到美國。 或許是天意，雖然JACE已為自己安排了滿滿的跳舞和作曲課程，但到埗後身體接連出現狀況 ——感染COVID-19、拗柴和被保健藥物噎到，她才驚覺：「哇，痴線！陳凱詠，你唔識照顧自己到咁？你仲一個人衝去美國。」JACE學習的舞蹈為vogue，該舞風的中心思想是自愛和相信自己，由於當時她的狀態與這些想法完全背道而馳，她便醒悟：「我學唔到㗎，嘥晒啲錢，一堂20美金，嗰期仲要冇搵錢呢，啲錢燒得幾快呀！」接下來，她終於願意把朋友的勸言聽進耳，放下自己的checklist，先好好面對自己的傷痛，再去旅行放鬆一下：「原來咩都唔做都係做緊啲嘢，原來身體、靈魂係需要咩都唔做。」 ｜這次我決定我的未來 從小到大不論學業、工作或伴侶，JACE也不太清楚自己的選擇，「唔知點解我讀傳理，不過啲人話我啱囉。我唔知自己想做歌手，不過唔打唔撞咁好彩做到咋。」所以，在這一個人生分岔口，她選擇以剔除法作決定，JACE說：「我唔要唔信任我嘅人，我唔要剝削我嘅人，我唔要會令我攰同唔開心嘅人，我唔要跟一啲我唔相信嘅目標或者節奏，我唔要bad vibes。」就像在迷霧中前進，她跌跌撞撞的摸索未來，也曾經手足無措，曾因複雜的合約內容求助Serrini，卻又不能直接分享合約內容，對方氣定神閒說：「Girl，搵間靚餐廳，很舒服的一日，飲住咖啡喺喜歡的環境慢慢睇，你識睇㗎！」真的獨立後，好友Tyson Yoshi不時主動激勵她：「喂！我信你得㗎！你自己可以搞得掂㗎！唔好咁容易低頭呀！」 簡單的幾句話，又足夠她繼續走上一段路，繼續前進。 ｜悲傷五部曲：終章 來到這一步，她決定面對低谷時的脆弱，完成了與《隔離》曲風同為ballad的《間歇性休眠》。《隔離》這首唱到街知巷聞的歌曲，是讓當年JACE感到世界未日的歌，「聽Demo嘅時候，我死緊啦、我死緊啦！我周圍同身邊所有人講，我爆晒粗，我要唱首咁嘅歌，收到歌詞我仲覺得我死喇。」完成錄音後，她至今仍非常印象深刻，當晚凌晨三四點坐上的士後，帶着滿足的微笑打電話給朋友：「我好開心搵到一首唔係自己寫嘅歌，睇落好似唔係自己嘅嘢，但原來作為一個表演者，我係有能力將任何作品都可以變成自己。」 經歷這麼多，她終於接受自己也有柔軟的一面，JACE笑着嗆自己：「你扮咩型啫？你扮咩下下Groovy啫？你唔聽呢啲㗎咩？痴線，你都有軟弱嘅時候，唔好唔承認！」《間歇性休眠》就是見證和記錄JACE陳凱詠成長、敢於面對傷痛的代表作。 至於未來？「未至於蝕錢咪算囉，死唔去就得，唔使有答案真係，做下做下就知。」JACE帶着微笑和語氣堅定地說。…