【水野月專訪（上）】被恥笑「傻仔」　馮錫潮——從MK仔走到百萬觀看創作者的神奇旅途

那年馮錫潮（Shawn、潮）讀完中三後便輟學，跑了去麥當勞做兼職。他辛苦儲了一筆錢買了一部iPhone 6，與另一個街童朋友在7-11模仿名導王家衛的風格，一邊扮金城武吃過期罐頭，一邊拍著短片，那時候他講出自己的宏願，麥當勞的同事都不相信他能夠做到，「覺得我係傻仔」。 社會對「街童」、「問題青年」抱以憐憫、或站在高位想伸出援手，但其實潮根本不介意自己的背景。這個MK仔只是想拍電影。跌跌撞撞，才24歲的他去年年底看準香港Instagram的reels市場尚未被開發，與拍檔Alex及一班兄弟共同營運「水野月」（@water_wild_month），主攻分半鐘短片創作，半年多極速累積16.5萬人follow。然而破百萬的觀看數字未叫他們滿足：「我哋嘅目標，是從直走返去橫，從9比16打響名堂後，返去16比9」。 一分半鐘，可以讓你有多深刻，可以帶你走到多遠？潮的reels未必如過山車般為你帶來起承轉合，不過，有時候有啲嘢就係咁，就是短短一剎那的花火綻放，足以在你心底留下烙印。 文：Heidi Wong (@heidi.is.strong) 圖：hct、Kelvin Or (@kelvin.okc) Stage 1:問題少年 「點解想做導演？因為睇咗王家衛嘅《阿飛正傳》，我意識到，點解有啲戲可以咁拍？睇上去好似好簡單，但實際功力可以咁深厚？」 潮這樣說。潮自嘲以前的自己是一個「問題少年」——不願上學、抽煙、飲酒。輟學後，有次一個社工姐姐帶一群街童到海洋公園玩，「唔使畀入場費之餘，姐姐還要每人畀50蚊我哋！」潮便決定不上班一天，跟大家去玩。 這個社工姐姐好喜歡與潮聊天，潮嗶哩叭啦的，一講話就停不下來。姐姐問，你的夢想是甚麼？阿潮說：「我想拍電影」。 社工姐姐遂帶他到遊樂場協會的「微電影工坊」，全班同學都是食煙飲酒講粗口的MK仔。潮在那兒拍了人生第一套微電影——《毒女》，故事講述香港已經成為一個吸毒合法化的社會。他竊笑道：「我喺入面嘅演技唔係講笑，真係很差。我淨係識扮梁朝偉、金城武。好刻意去扮。我無學戲，但以我Social之鬼嘅性格（厚面皮），我都覺得好自卑」。 那時候，社區中心開設了演戲課程，潮又去了，「佢哋教我『真聽、真講、真睇、真感受』」。與此同時，社工一直跟進他的個案，又介紹了他讀浸會大學與毅進合辦的電影創作基礎文憑。神奇地，這個MK仔與電影，似乎逐漸靠近了一小步。 Stage 2:不服輸 潮說自己是「Social之鬼」，不無因由：「嗰陣我喺麥當勞返工，我去全個油尖旺區嘅麥記都唔使畀錢。你意識到呢件事嘅嚴重性嗎！」潮呵呵笑著。那時候，靠著他的健談性格，在電影文憑課程及麥當勞認識了幾個知心朋友，例如電工背景的阿勤、攝影師Kelvin等，他們都願意和他一起玩、一起拍攝。潮決定買一部相機，但被騙買了一部不能收音的，於是他在淘寶額外買了一支8元的機頂咪。他又開始自學「慢快門偷格」等技巧，「終於識正反打、廣角拍啦。」 那時，全班20多人打算一起拍一條微電影，並推舉了潮做導演。然而部分同學不同意，在背後說潮只是因為有外面的朋友幫忙，作品才會好看，「我嗰陣20歲，脾氣好爆，我真係想打到佢哋仆街。阿勤就話，唔好呀，返唔到轉頭㗎。後來我決定用第二種方式還拖，我要用作品說話。」 潮在下一份功課刻意不叫Kelvin幫自己掌機。他邀請了阿勤，加上一個「MK妹」同學，還有被老師安排一個自閉症的同學一組，「我就係導演編劇加服裝燈光，阿勤係攝影助理，MK妹係美術」。那套微電影叫《無眠》，講述吃了一款藥後，在夢境就可以得到自己想要的東西。   當他的同學用幾萬元租場地、機器拍攝，潮的微電影功課成本只是1200元，「600蚊用來搭的士、買啤酒；另外600蚊我租咗酒店拍攝。其他同學匯報自己份作品，話畀老師自己幾辛苦，用咗幾多器材，我反而係想講，你知唔知點解我呢個鏡頭係咁樣？」事後，Kelvin問潮，為何你不找我幫你？潮說，我要證明給大家看，我不需要外人幫助，我靠自己都可以。 潮一心只想學習電影知識，對於課程中的中英數通識科目一概不感興趣，最後他沒有完成課程，經學校老師介紹，到了一間製作公司學習調色、剪接，「我有好多嘢都唔識，但我快手，因為我喺麥當勞返工，炒薯條，你知唔知佐敦嗰間麥當勞排隊有幾勁？但我好快手，好靈活。」潮又把自己的作品放上YouTube，雖然觀看次數不算多，但開始被部分圈內的電影人留意到，「呢個係一種助力」。 Stage 3:見不到自己的低谷 電影世界就好似一個可觸摸的夢幻國度，潮越來越沉醉於微電影創作，他成立了水野月，先後與朋友們創作了《畫裡面的人》、《日禾系列》等微電影。直到去年年初，他被《X你的世界末日（The End of…