新生代演員郭爾君的童年救贖：「電影帶我脫離孤獨」　Alma與張國榮的小秘密是…

共同渡過了屬於張國榮的4月，懷念哥哥的風，仍繼續吹。由香港電影資料館策劃的專題放映活動「芳華再續」，觀眾反應熱烈，主辦方決定在9、10月加場，門票將於5月19日開售。在宣傳片出現的郭爾君（Alma）除訴說了張、梅作品點滴，也與我們分享了她對電影的堅持和熱愛。這位新生代演員視電影為童年的救贖，更與張國榮有一個小秘密！ 把張國榮當朋友　「電影帶我脫離孤獨」 作為一個在單親家庭成長的獨生女，Alma坦言童年好孤獨，「當時諗，會咁樣孤獨幾耐？」電影彷彿帶有魔法，為年幼的她帶來救贖，「當時透過電影見到唔同年代嘅電影同演員，經常見到佢哋，令我覺得好有親切感，好似見到朋友一樣，哥哥就係其中一位，帶我脫離童年嘅孤獨。」 Alma逐漸成長，「感受多咗呢個世界，開始明白更多電影入面講緊嗰種情。」她續說，戲劇是把我們日常生活當中較為重要的部份抽取出來呈現給觀眾，乍聽很深奧，她的概括卻很簡單：「當時對唔同人，社會甚至係文化嘅理解，好大部份係來自電影。」 重睇《霸王別姬》五次　「呢幕簡直係震撼彈」 而真正令Alma認識並喜歡上張、梅，正正就是透過二人的電影，「小時候，佢哋就係電影入面熟識嘅面孔，直到佢哋離世後，我長大先開始補完唔同嘅作品，覺得畀佢哋深深感動到，有一個連結。」例如哥哥，她深刻地欣賞並喜歡張國榮源於《霸王別姬》，「睇完第一次之後，我再重睇咗五次，當時好喜歡哥哥嘅演出，但仲未識得去分析點解自己會咁鍾意一套電影，只係知道一口氣重睇五次，當時真係好愛好愛！」 《霸王別姬》經典場面數不勝數，最令Alma印象深刻的，要數段小樓遭批鬥。由張國榮飾演的程蝶衣為張豐毅飾演的段小樓畫面譜，直至段小樓為求自保，與鞏俐飾演的菊仙劃清界線，「菊仙回眸同蝶衣對望，佢哋都明白到，原來自己愛嘅男人根本唔愛自己，呢幕簡直係震撼彈。」 態度決定高度　「佢哋令我學到最多嘅嘢」 張國榮的厲害之處，是他能夠完全融入角色，「佢完全沉浸喺角色，完全信服佢就係程蝶衣，當然睇番製作特輯，就知佢花費咗幾多嘅努力。」Alma喜歡哥哥的程度，「我係去到會睇晒佢其他嘢，唔只電影，你會發現，佢對自己要求好高，對其他人好溫柔善良，鬆弛有度。」 除了演技，Alma覺得張、梅待人處事的態度，對她影響更深。二人對於自己專業的尊重、張國榮對於世界的溫柔善良、梅艷芳對於朋友的義氣，「呢啲係佢哋令我學到最多嘅嘢，無論係作為一個演員，定作為一個人。」 向張國榮訴衷情　「哥哥我好緊張」 Alma更分享了一件趣事。香港演藝學院畢業的她表示，考進APA要通過三輪面試，首輪面試時，「因為太驚，我早咗一日去。」翌日，她重臨學院，仍然緊張，面試前決定往「星星牆」和屬於哥哥的星星聊天：「我同佢講，哥哥我好緊張，點算呀？」最後連過三關，成功考進APA，「之後讀書，有咩唔開心，我都會偷偷地去星星牆同哥哥傾計，好似好白痴，但呢個係我同哥哥嘅小秘密！」 「香港流行文化節」的「芳華再續」活動，選映了20部張國榮、梅艷芳的經典作品，於4月至12月上映，讓公眾能夠透過光影，緬懷兩位巨星的芳華絕代。了解詳情請瀏覽電影資料館網站 www.filmarchive.gov.hk 。