搜尋結果: #追星
【#城事在人曼谷篇 ep1——泰花痴阿金】｜追星追到移居泰國！在永夏國度追星是甚麼一回事？
小時候的你，大概都有想過「我的志願」。可是長大後，你與心目中理想生活的距離差了多遠？ 今日故事的主角阿金，血液中流着濃濃的「追星血」。中學時從《勁歌金曲》認識韓星Rain開始掉進韓坑，為了追韓星，她讀韓文，夢想做娛記，近距離和偶像交談。但實現夢想後卻漸漸發現，把追星煲劇變成工作與想像原來有出入。與此同時，她掉進「泰坑」和「BL坑」，又跑去學泰文追星。及後發現，自己已深深愛上泰國這地方。 經過一番掙扎後，她不做記者了，反而在泰國曼谷找了一份比香港人工減半的工作，決心留在這個慢活城市。你可能會問值得嗎？回望20年追星生涯，生命的軌跡由舞台閃爍的星星引領，一步一步尋覓自己心之所向，她這樣為30多年的人生總結，同時勸勉同路人：「追星令我變成記者，令我學一個語言，令我學做應援設計，追星令我變成一個更好嘅人。你知道你嘅星畀咗乜嘢快樂你，就已經好足夠！」 文字：Heidi @heidi.is.strong 設計：Kayan @yipyn ｜追星追到做記者 阿金追星年資已達20年，「小學已經叫媽媽留一蚊畀我抽YES卡，不過嗰陣好單純，只係擁有一件明星產品或者雜誌，我唔覺得嗰啲係追星。」真正讓她開展追星之路的，是Rain。「我好鍾意睇人唱歌跳舞。我唔係睇《浪漫滿屋》入坑，我係睇《勁歌金曲》入坑，哈哈！」 15歲的高中生，雖未財富自由，不能飛到韓國，但因當年紅得如日中天的Rain常常到香港，阿金情願不上學，也會每次到機場接機，連父母也拿她沒轍。在阿金升中五的時候，有次Rain到尖沙咀出席活動，現場很迫，人貼人，「我同Oppa距離好遠。但我見到記者哥哥姐姐唔需要排隊，甚至差唔多活動開始先到現場，仲可以近距離訪問。我見到呢個畫面，我諗，如果我要近距離見到Oppa，似乎我就係要做呢個人？」她遂以浸大傳理為目標，惟會考滑鐵盧。為了讀新聞系，她改到澳洲升學，再到韓國攻讀韓文一年，一心回港後做韓娛記者。 「好好笑嘅係，我讀完後，Rain嗰一年啱啱入伍。不過我覺得唔緊要，我都想做到娛樂記者。」她的第一份工作，便是當年膾炙人口的《YES！》雜誌。 ｜完成夢想，然後呢？ 就這樣，阿金開始了娛樂記者生涯。做過數間媒體的她，最當紅的韓星，例如「四大天王」金秀賢、李鐘碩、金宇彬、李敏鎬；韓團「Beast」、「B.A.P」、「After School」、「FT Island」等都訪問過了；大型頒獎典禮「MAMA」也採訪過，夠圓滿了吧？「但原來當你將樂趣變成工作，係咪真係一件好事呢？當年追星睇劇，係為咗開心，好放鬆；但當你返呢份工，睇劇係為咗打幾千字稿，呢個就已經變成一個負擔。」 在這段低迷時期，阿金從泰星中得到了新的救贖，「嗰陣返緊上一份工，意外見到泰版《浪漫滿屋》，其實以前都會睇泰國電影，《人妖打排球》、《拳霸》，呢啲好老土嘅。嗰陣心諗，泰版浪漫滿屋係咪好似Tony Jaa咁？你竟然翻拍我Oppa嘅劇，我就睇吓你點！」怎料一開劇，驚為天人，「原來泰仔好靚仔！」 自此之後，阿金開始對泰國影視作品著迷，看過了笑片《我很好…愛死你》後，更是愛上了泰國影星Sunny Suwanmethanont（暱稱P Sun，P即哥哥、姐姐意思），「佢係年紀比較大嘅影帝級，唔係偶像派，所以要搵中字版嘅片比較難。為咗聽得明佢講乜，我都學吓泰文啦！」於是她跑去了工聯會學，但課程進度太快，讀完低中高三個課程，她還是一句泰文都講不出來，「但我覺得自己仲有一團火，想學泰文，又唔知依家份工做緊乜」。終於，在2017年，她內心交戰了數個月，決定裸辭到泰國學泰文，追泰星！ 她怎麼也沒料到，人生的走向在此又準備拐一個大彎。 ｜從愛上泰星到愛上泰國 阿金第一次在泰國追星是在2018年，她單人匹馬闖入P Sun的電影宣傳活動。看到燈牌後，阿金戰戰兢兢，用英文夾雜破爛的泰文，詢問如何加入Fans Club。有別於其他粉絲傾向「排外」，泰國的P Sun粉絲們反而熱烈歡迎她，「最神奇嘅係，每個粉絲都會有『追星三寶』，一定會有凳仔。追韓星嘅話，佢哋一定唔會理你，企你前面照開摺凳。但追泰星嘅話，有摺凳大多數企後面，矮過你嘅人全部企前面。佢哋會確保全部人都可以見到個星。」 在阿金的眼中，韓星真的是如天上的星星一樣遙遠，大家無論多努力，都永遠不會觸碰到Rain，不會有對話的機會，他更不會記得你是誰。但那天活動完結後，粉絲團的人邀請她參與「點名活動」，介紹她與P Sun面對面交談。「嗰日之後，我不停不停追P Sun，追到佢都認得我呢個人。追泰星，你勤力，起碼你粒星會記得你。但追韓星，我諗你要花五六七八九年，先可以接觸你嘅星，見到你嘅樣。」 有別於某些粉絲們為了搶得有利位置，各不相讓，追泰星卻讓阿金感受到泰國人的友善與熱情。「其實我唔知係咪佛教（國家）問題，但我覺得係社會影響，當你成個社會八成嘅人都好peaceful，會融化到你身邊嘅人。佢哋一下子就會拉你入群組，你就會十幾二十人一齊追星。」…
【從劉德華到F4到MIRROR】從看娛樂圈興衰領悟人生 應援燈牌始祖——麥光輝師傅
表演場館內，燈光迅速熄滅，音樂轟炸，此時粉絲們馬上跟隨節拍揮舞手上的燈牌，忘我地大聲呼喊。滿場燈牌，彷如點點星光拱照台上。 若說歌手和粉絲的榮耀是一體的，那麼這份榮耀肯定少不了製作燈牌的人。麥光輝今年已經71歲，從上世紀8、90年代開始做燈牌，見證着歌迷們從追劉德華、到F4、飛輪海，再到MIRROR、林家謙⋯⋯當香港歌壇浩浩蕩蕩迎來另一新世紀，已經可以兩蚊搭車和攞生果金的麥光輝亦不甘於停留在舊時。從前大家用LED燈牌，現在他創作出可充電可換圖案的燈箱。他又自學電腦畫圖、laser cut，更是一個超in的網民：「你有無睇過香港做設計慘過食屎協會？畀100蚊又要畫又要改，到頭來成件事值幾多錢？」 麥師傅勞碌近一甲子，戲言自己常「生意失敗」，尚未發達，但也不願就此停下來。若然人生方向有些許迷惘，也許可以聽聽麥師傅的格言：「大家覺得追星就係要做最光嗰個，畀台上面嗰個人清晰見到自己。但（燈牌）太光唔一定睇到，清晰先可以睇到。」追星、做人，本質其實很似——我們未必需要做最光芒四射的人，只要認清自己心之所向，一切都總會被看見。 文字：Heidi @heidi.is.strong 攝影：Hiuyan @hyphotgrap 設計：Owen @wai.ho.98 ｜半輩子與光為伴 麥師傅80年代從事進出口玩具生意，並在大陸設廠，主要做燈籠、螢光棒等產品。有日，麥浚龍（Juno）的經理人知道他對燈光產品熟悉，特意登門造訪，「佢問我可唔可以整一塊板，整啲字喺上面，叫我試吓。」那時候他並沒有概念要怎樣做，誤打誤撞下，他把「J」字固定在亞加力膠板上，後來幾次再整，又成功多放幾個字上去。 那時候，香港還未有人專門做燈牌，「嗰時香港追星會用燈牌嘅人少之又少，佢哋一小部分人會用鐵絲網整，供電用水電，仲要搵架車推出去，好大陣仗。」後來，麥師傅的燈牌在追星一族中廣泛流傳，「最犀利係啊啤梨，葉文輝！嗰班粉絲好勁，要求我整一個四五呎高嘅燈牌，佢哋又會攞喇叭、查查（鈸）。」 及後，新加坡、馬來西亞、泰國粉絲紛至沓來。「我做唔到（大）量，但我做到有特色。例如泰國班粉絲，佢哋嘅燈牌又有象又有樹，畀人知道佢哋係泰國嚟嘅。」麥師傅執起一支以LED燈串組成的燈棒，原來這個也是他首創的產物，他驕傲道：「當年大陸啲人當我皇帝咁搶我啲貨。」而現在，LED燈泡亦早已普及，「你知唔知一盞呢啲LED燈，一開始賣幾多錢？199幾年，起初大陸有得賣嘅時候，25蚊一粒。依家？一毫子有十幾粒啦。」 ｜那些被忽略的心思 對着光的這些年，麥師傅深知其實光除了明亮，也會刺眼。他遂研發了「燈箱」，原理和街邊招牌一樣——一個白燈箱，以「尿袋」供電，外頭以鏤空有色膠片描繪圖案。燈箱光線柔和、更輕便之餘，更可以換膠片重用、改圖案。其後，他又想，如何可以把燈箱的用途增加？他又研發了可放入相機機頂位置的小燈箱，讓粉絲「飯拍」的時候吸引偶像的注意，「偶像見到燈箱，就等於望到鏡頭。」 以前做LED燈牌，麥師傅通常無需草圖，直接手造圖像字型再焊接；現在一切都go digital。麥師傅如常坐在電腦前，一個個按照日期及明星分門別類的檔案夾塞滿螢幕。單是一個張敬軒的file內，便已有幾十張訂單，每個都獨一無二，當中有不少讓非粉絲摸不著頭腦的slogan，例如「網癮中年張敬軒」、「七師傅老公」等。再看看MIRROR的檔案，除了人名，麥師傅更會親自畫圖，「最難係大家畀張圖，以為我就一定做到，但其實部機器係計線條，如果啲線唔連，都係要重新再畫一次。」 想要製作燈牌的客人會先WhatsApp麥師傅，麥師傅再按照需求設計畫圖，一塊燈牌三百多元，「畫個公仔都已經畫我一日。」如果麥師傅是年輕設計師，一切可能都是手辦眼見功夫，但對於年屆七旬的他，卻是一步一腳印走來的：「我全部都係自學。我小學都未畢業。我唔識機械，乜都唔識。我1993年買第一部電腦，嗰個人問我，你識唔識英文？我話唔識，佢話咁你唔好買啦，我一定學唔嚟。但我話我一定要買。」有時候那些追星妹妹會叫麥師傅「收貴啲啦」，事實上，他也會因為粉絲無理地不斷要求「改嘢」而感到不忿，看着電話的「奪命追魂message」，麥師傅淡淡然道：「呢個，遲啲先覆。」 ｜舉牌/做牌的原因 歌手、樂壇都有起有跌，麥師傅的職業生涯亦然。他笑言不懂把生意「發大嚟搞」，角色也很被動，「娛樂圈有週期性，全世界都係。有衰落都有興旺。」不過，一日有粉絲，似乎就會有燈牌的需求：「粉絲要燈牌，係想支持粒星。你如果就咁過去，無特別嘅嘢，你就唔會出位。追星嘅人都係想畀人知咁解。」 粉絲繼續高舉燈牌，是為了讓偶像得知支持者一直存在、一直陪伴。而麥師傅堅持做下去，只為保持年輕：「一個人如果唔做嘢，會變殭屍！」在娛樂圈中，他最欣賞的是79歲的尹光，「你見到佢嘅動作好靈活！你就係要保持呢個心態，佢呢個年紀仲會作曲、諗點樣氹人開心。如果只係諗享受，個腦唔用會生鏽㗎。」 看過這麼多瘋狂粉絲，伴隨着歌迷一起走的麥師傅有無追過星？「我欣賞自己多啲。」一生中未曾飛黃騰達的他，微笑地自信道。 In ACOO, you can see #ACOOPerson. #追星 #燈牌 #MIRROR…
【不一樣的追星路】不能跑、跳、企 輪椅女孩燃燒整個青春追韓星：我係搵一個戀愛寄託
「차가운 어둠이 널 （如果黑暗的寒冷） 외롭게 가두면 （將你孤獨地困住） I’ll be there to save u I’ll be there to save u……」 按下播放鍵，一把溫柔、略帶沙啞的歌聲在空中迴盪，歌詞句句像是在撫慰着聽者的心靈。患有脊髓肌肉萎縮症（SMA）、26歲的黃靜茹（Fish）追韓星14年，佔她人生超過一半的時間。從中學時期被Super Junior帥氣的外表吸引，開始「入韓圈」，到接觸到男團B1A4，後來因選秀節目認識「國民男友」姜丹尼爾（Kang Daniel），他的一顰一笑更是叫她傾心。她說，Daniel是她的「戀愛寄託」，「我單純係搵一個idol做戀愛寄託，咁樣我就唔會恨拍拖。」 不追星的人或許難以想像，歷盡千辛萬苦，他們換來的滿足感是甚麼？「有件事好開心！話說噚日演唱會影group photo我上唔到台，台下佢哋安排好位置，我坐喺最邊邊，Daniel出嚟影相之前走過嚟，攬一攬我，講咗句thank you so much！」天曉得這個輪椅女孩為了見偶像一面付出了多少？就是這個回眸、肯定，所有走過的崎嶇路都頓時變得值得。 文：Heidi Wong @heidi.is.strong…