【陪你仆街】用塔羅通俗貼地為港人撥開迷霧 棍兄@喱啲塔羅：個天覺得你任性 但你都可以照做

【陪住你仆街嘅塔羅師】 在大台的電視劇，但凡有占卜塔羅的角色，總會是一個被冠以「神婆」稱號，披著黑色頭紗巾的長卷髮女生，在一個黑漆漆的房間看着桌前的水晶球，雙手凌空「作法」。然而，90後的塔羅師棍兄正是想塔羅「通俗啲、貼地啲」。 在IG上，棍兄以一個身穿李彩華小背心的光頭仔手繪形象示人。他以趣怪插畫配搭占星命理分析內容，吸引超過3萬人follow，幾乎每個post都逾千讚好。置身香港這個讓人窒息的地方，城內的人總想求指引、求清晰視野：「香港人覺得好多嘢都係命定，相信係有人安排嘢比自己。但你安排，點解我就係要逆來順受，或順來順受？」就算仆街也是體驗，試過仆街先心息。最後路怎樣走下去，其實從來都是自己決定。 與其說做神機妙算的大師，可能他更希望做一個陪大家仆街的光頭仔。 文字：Heidi @heidi.is.strong 攝影：Hiuyan @hyphotgrap 設計：Owen @wai.ho.98 ｜始於迷茫 也許是「天份」，棍兄自小便喜歡與人談心，他笑說自己在18歲才初戀，但早於小學時期已經懂得開解失戀的同學仔。 「我本身唔信啲咩星座、塔羅。只不過好耐之前，22、23歲嘅時候失戀，無緣無故被分手，完全唔知發生乜事。要搵個出口，朋友帶我去做塔羅」。當時的塔羅師分析了棍兄的性格，溫柔地解釋他分手的原因。這次經歷後，他買了一副塔羅牌放在家裡。2020年COVID期間，本身任職PR的棍兄被放無薪假。「究竟點算呢」5個字充斥他腦海。此時，他想起了那副塔羅牌，於是自己上網自學、幫自己抽牌。 從頭到尾都無「跟師傅」的棍兄，覺得自己漸漸上手，開始找朋友練習，其後更膽粗粗上連登開post幫陌生網民免費練習，「塔羅呢個工具，其實學完唔係單單解牌就算，簡單如你點樣同人溝通，都唔係咁容易」。碰巧那段時間他開始full time攻讀文化研究碩士，便開始趁空窗期開檔幫人占卜，「carefree咁做呢件事」。後期他又自學了占星，「你越去掂呢個身心靈嘅範圍，你就覺得，哇浩瀚到，好似我仲係未夠學得多咁」。 ｜貼地光頭仔 為了開展自己的塔羅事業，棍兄為自己開了一個IG專頁，叫「棍兄@喱啲塔羅」。「棍」是他自嘲「神棍」，「喱啲」即「lay（layman）啲」。有人以為他真身也是光頭，「其實我有頭髮。我嘅brand image係，通俗啲、貼地啲，就好似著住背心踎喺地下嘅感覺」。（後來，他又解釋，他只是不想畫太多筆頭髮，才畫了一個光頭。） 他在專頁「講經」：以各星座性格出「迷因」圖、分析明星星盤；後來甚麼都想說，他教大家面對失戀，「與其說他變了，不如說他死了」，又會偶爾諷刺時弊，例如教讀者如何稱讚別人，可說「點樣可以好似你咁優秀？」。 「變紅」並不是他在社交媒體經營自己的原意。反而是，他有感香港人對於塔羅誤解不少：「我好相信塔羅係一件隨意嘅事。我甚至覺得我同其他塔羅師唔同嘅係，佢哋可能要講好多『儀式感』，要點洗牌、要聆聽內心之類，我自己覺得無所謂，隨心就OK。」 ｜香港人求甚麼？ 屈指一算，棍兄一個月大約接觸約100個客人。讀文化研究的他，學會了宏觀看待事情。分析客人問題時，同時從鳥瞰角度看到社會現象，「搵我嘅頭三位，係愛情、事業，之後就係移民」。 香港人的「低氣壓」，即使不是命理師傅，只要你置身人群之中亦可感受到。尋找不到方向，只要求神問卜。「好多人以為移民就係解藥，一走了之就可以重新開始，羊群心理，人哋移民搞到自己都想移；又或者喺香港實在太唔開心，太侷促就誤以為移民就可以開心啲。試過有客人自己都唔知為咩移民，我幫佢開左牌，佢其實長期留喺香港唔開心，但係去咗外國都係唔開心。佢真係需要出去外國唞一唞氣，不過呢個唔等於係有需要去移民」。最後，棍兄梳理這個客人的內心後，反建議這位客人嘗試旅居或數碼遊牧，取得兩個極端選擇的平衡點。「我哋好多時候有好強烈嘅感受，但呢啲感受有時會太亂，好大機會落錯決定」。 話雖如此，棍兄認為塔羅與占星兩個「系統」，都不是「個天同我講點樣，我就係點樣」，而是自己有命運自決的能力。「有啲塔羅師覺得，抽到咁你就應該要咁咁咁啦，但我覺得唔係。雖然件事可能會咁發生，但或者你改變一啲嘢，就會轉變個狀況呢？又或者，個天覺得你咁做係好任性，但你都係可以咁做㗎。我當你真係仆街，都係一個體驗。」 ｜回應時代 陪著你走 今年年初接二連三的自殺新聞出現。他在IG推介幾個巨蟹座歌手的治癒系歌曲，例如鄧小巧的《最壞時活多天》、陳健安的《之後的一天》等，caption寫道「叫春唔係人人識，但唔識請你唔好忍」。「我個page嘅follower話多唔多話少唔少，影響力一定有。你見到嗰幾日IG全部都係同一樣嘅新聞，你就知道，其實可以『講一啲嘢』」。 到最後，客人只想要指點迷津，還是心理輔導？他認為自己只是提供「洞見」和分享。說到底，信則有不信則無。這個世代，大家無非都只是想找一個方法讓自己能舒舒服服過日子，做到了，也許就是最幸運的人。 In ACOO, you can see…