【Hello, strangers, this’s mi.】 若然說Youtube世界是一個五味雜陳的滿漢全席，那麼「蛀蟲米」應該是一味看上去平平無奇，吃起來卻暖入心脾的一鍋粥——你未必會吃上癮，但當你生病的時候，你總會想來上一碗。 這個25歲女生，每周都會頂着一個紅色小丑鼻子，在客廳淡黃色窗簾前的一隅拍片講佛。人生軌跡與佛相交，或是源於米年少時的苦難：她在中學時期喪母，其後開始苦苦追尋人生意義。在大學讀哲學但仍找不到答案的時候，佛學像一個慈祥的老爺爺現身在米眼前：「喺哲學好似畀屎我食嘅時候，佛係呵返我——唔係話佛陀愛我，就會幫我處理一切，而係佢令我知道，我可以自己決定命運」。 文字：Heidi @heidi.is.strong 攝影：Hiuyan @hyphotgrap 設計：@wai.ho.98 ｜為何生存？ 「我覺得自己要受嘅苦好似喺青少年階段已經受曬」，米這樣說，因為她的母親在她15歲時因癌症離去，這對於一個小女生而言，無疑是一個「毀滅性的打擊」。她很想知道自己為何要誕生於世上，「點解我會喺度、點解我要生於呢個家、生於香港？」，但一直都找不到一個讓自己順服的答案。 於是，她大學時讀文學院，主修哲學，但西方哲學只讓她感到「更棘」，「西哲嘅知識論同形而上學，好似純粹喺一個文字遊戲，例如，Mary喺一間房入面認識所有紅色嘅知識，但佢出去房間，先第一次真正見到紅色。咁佢係咪再學會啲新嘅嘢？感受係咪一種知識？後來我就發現心靈越來越棘，或者會令我質疑，我嘅痛感係咪真實嘅？」大學Year 2時，米為了「靚grade」選修了佛學課程，「法師一入嚟就笑笑口，我好期待自己會駁斥到佢嘅嘢。但佢第一堂竟然係講科學，講佛無所謂一個造物主，又提出打坐對腦電波影響嘅實證。我即刻O咗嘴！」。 這位法師，把米心入面的疑惑破解，讓她感到莫名興奮。於米而言，佛並非讓她人生變得美滿，而是讓她學會「喺一個充滿屎嘅空間應該點自處」。於是，她決定副修佛學，畢業後更繼續攻讀佛學碩士。「佛」讓她了解自己，接受「無常」。 ｜全民造星？ 米從小喜歡表演、喜歡唱歌演習，曾學習形體訓練兩年，「我屋企本身唔係好認同表達情緒呢件事，形體幫我釋放內心」。 2021年，全民造星4公開選秀，開放即場walk-in報名。米好想為自己做一件事，讓自己不會後悔的一件事，於是那天她早上6時便到，成為了全場第一個參賽者，「當時我覺得自己好型！」然而一如所料，她落選了，而且評判更是毫不留情的批評她，「當刻我太驚訝，好似隻meme倉鼠一樣呆咗。完成成件事，我踎喺廠外。夜晚不斷回想當時嘅情景，不斷自我攻擊」。最後，她在節目中出現了僅僅3秒。 沉澱後，米告訴自己，評判只是為了節目效果而對她「好harsh」，不過同時她亦自我拷問：自己的路應該怎樣走下去？她想到了近年社會氣氛低迷，「唔知點解有個想法，好想做一件事，等大家可以開心啲自在啲」。她先是下載了一個匿名交友通話app，打算開解陌生人的心，「但每次都畀人cut線，可能佢哋預咗係要講鹹濕嘢」。 ｜癲喪地講佛 與此同時，米發現身邊越來越多朋友知道她鑽研佛學後，向她查問有關佛法的事，「佢哋話，我好似發咗光咁，想了解我嘅改變」。她遂想，會否可以開一個Youtube Channel講佛？朋友聽完她的意念，講了一句：「我覺得香港人就係需要呢啲嘢」。米聽罷，即日去了深水埗，買了一套最基本的拍攝器材，當晚「好似野人一樣，無修眉、無剃鬚」就拍了第一條片。她穿了全黑的衣裳，配以一個小丑鼻子，又用了誇張的肢體語言表達，「好dramatic，想做到一個小丑效果，引人笑」。 一開始，米的頻道觀看少得可憐，「得20個views，其中仲有7、8個係我自己click入去睇comment」。後來，她扭盡六壬想為內容增添趣味，例如改編了COLLAR的《Call My Name》，一句「BU BU BU BU BU BUDDHA！」在社群引起熱議。她說，自己慢慢被注意的原因，是自己堅持以理論配以日常生活實例解說佛法，這正是她與其他「講道者」的分別：「即係一個長輩灌輸知識畀你，大家天生就會抗拒，但我成日都話，你見到一條女，癲癲喪喪咁講啲好Make sense嘅嘢，就會令人好想睇落去。」   ｜創造因緣 現在，米的頻道已累積逾6萬訂閱，每星期會更新一次；instagram會發布一些輕文字「講經」開解大家，亦有接近2.5萬followers。不少粉絲會向米「求救」，「我試過一日收到50幾個人DM，頭一句都係，我爸爸大病就快死了、我老公有抑鬱，自己都有情緒病，點算好？⋯⋯當有人求助，我無可能唔理。」 米眼見近年身邊多了年輕的佛弟子，認為香港人近年的確有「向內尋找平安」趨勢：「氣氛越來越低，就會衍生兩個極端，一批人係絕望，覺得所有嘢隨便啦，於是向外尋找快樂，呢種係唔健康嘅快樂；另一批人會意識到，唔向內尋會崩潰，所以追求身心靈嘅滿足，想搵一個出口，想了解自己同宇宙多啲。」她認為，佛法開始被意識到是「一套好正嘅生活哲學」，「佛教唔係一樣會主動令人快樂嘅嘢，唔係神奇藥丸。學佛可以更真實地睇到呢個世間嘅一啲邏輯，睇到每一個人背後嘅苦，又睇到自己嘅一啲不足。只要我哋願意去學、去修，就會發現有好多本來令我哋好唔開心嘅嘢，好似都冇乜嘢，咁已經可以減少到好多煩惱」。 近年的社會事件，以至持續3年多的疫情，都令香港人變得無比壓抑：「呢個說法好似好離地，但無常就係講，我哋每個人每一刻都係變緊；執著嘅意思係，我哋太過覺得一件事一定要係咁嘅模樣。覺得自己『原本可以點點點』。但緣起法就係講，所有嘢都係因緣條件所組成。因緣未夠，依家唔能夠做到某樣嘢，就係唔能夠做到。」   ｜放下得自在 米回想自己15歲的那年，走過的那段喪親傷痛。那是她心底的一條刺，「點解我喺媽媽生前無盡力對佢好？點解成日躝街唔肯返屋企？點解喺佢走之前仲去咗台灣旅行？」所有愧疚，就像一把把利刃一樣刺到她的心坎。每一次夢到母親，她都會「嘔吐式」傾訴情感。學哲學，就是因為她想證實一切都是「命定論」，一切傷痛都是命運安排，與自己無關。 最後，是佛拯救了她，「就係緣起呢回事話我聽，從來都唔會喺一個原因導致一個結果。我開始體諒自己點解當初唔想返屋企，因為我接受唔到呢種痛苦。我開始諒解過往嘅自己，我唔係有心傷害媽媽」。她找了一天，去到母親的墓前，說：「如果你成日嚟我嘅夢，會影響你，咁你唔好再成日出現啦，半年一次夠了。」自此，母親果真少了出現。有日米洗碗時，溫暖的陽光灑在臉上，她不自覺地哭了起來——她終於覺得自己是活在當下了。 一切緣起緣滅，造就了我們的經歷。命運不能預知，但或許我們可創造一些因緣，讓事情變得更好？ In ACOO, you can see #ACOOPerson. 後記：日常生活中如何體現「佛」念？ 說到底，那麼「佛法」的概念，在我們的日常生活中如何能夠被體現？米舉例，有些人會覺得自己一整天都走霉運，例如上班出門口後才發現沒帶錢包、想吃的午餐款式售罄、到夜晚又與另一半吵架⋯⋯「你認為自己係黑仔，係因為你將第一件事嘅情緒痴住自己，所以接下來你同家人溝通時候就會控制唔到自己情緒。」又例如，香港大部分父母都是「批判式」與子女對話，米說，這些家長並非不愛子女，而是不懂愛子女，甚至只是未曾感受過愛或被欣賞：「等於你唔會嬲一個唔識計微積分嘅BB」。 米總結，要是覺得自己情緒如火一樣燒起來，記得呼吸，把早前的憤怒刪除掉，才開始面對下一件事：「好多時候就係一個呼吸，已經差好遠」。

在繁忙時間，走過銅鑼灣街頭，嘗試仔細數算着，眼前看到幾多張臉是掛着微笑的？ 在一幢幢商業大樓中間，隱藏着一間小店，入面放置了好一些精緻的盆栽，上面放了寫上「Please don’t die」、「I be-leaf in you」的心意卡。這些小生命全都出自50多歲的Jenny之手。年輕時從事廣告業的她，過着日夜顛倒、紙醉金迷的生活；奔波大半生，驀然回首——自己的人生從未試過慢下來。於是，她決定慢下來，開始接觸園藝治療，盼以植物療癒自己、療癒大家。 曾聽說過，照顧植物這回事，我們未必立刻覺察牠們的生長，不過假以時日，我們或會驚覺牠已經長高了不少、甚至開花結果。任何毫不顯眼的改變，正正在標誌着這段進程，植物如是，自我療癒的這條路亦如是。 文字：Heidi @heidi.is.strong 攝影：Hiuyan @hyphotgrap ｜燃燒生命返工 在90年代，Jenny剛大學畢業後便投身廣告界，從事Account Servicing，即「湊客」。做廣告，「燒肝」人盡皆知，而Jenny的崗位，是負責周旋於創作部及客人之中，角色比較被動。而且時常要「趕deadline」，每日幾乎工作18至20小時，壓力很大，「花好多時間開會，同creator開會，同客人開會，paper work變相就要留喺夜晚做。細細個真係成日都做通宵，但年輕嘛，所以覺得無所謂」。 那時候，他們的最大解壓方法，便是去唱K和飲酒，再不然就是到通宵營業的茶居飲茶：「嗰陣仲未有Red Mr.，最hit係加州紅，我哋同主管好熟，佢會留房畀我哋。我哋一星期可以去足3晚，OT到凌晨1點先去到，唱到早上6點，返屋企瞓一陣，沖個涼再返工。」問到為甚麼是唱K？「因為可以發洩呀！食嘢發洩、唱歌發洩、飲酒發洩」。 另一個發洩的方法，是消費，「你有無經歷過一段時間，係去I.T.要排隊畀錢？因為佢有好多日本嘢，當年好流行。我哋做廣告，唔多唔少都有少少虛榮心，加上你自己都要被吸引，先可以說服人買嘢。嗰陣市道好，容易賺錢、容易升職」。最後，錢賺得來，花得也快。然而靜下心神，當年的Jenny也不禁問自己，是否想一直維持這種生活模式？   ｜疫情迎來生命轉機 做了廣告十多年後，Jenny在決定離開香港創業，賣設計傢俬。直到2019年末，Jenny母親去世，她有感創業的階段都差不多應完結，遂決定放下工作，回港陪伴父親，怎料2020年便遇上疫情，一切計畫被迫暫停了。父親身體不太好，她的情緒亦十分壓抑。某日她上網隨意搜索，「園藝治療」4字映入眼簾。當時她根本對園藝治療毫無概念，頂多就是小時候會「搞吓花草」，插插花，聖誕節會佈置聖誕樹。不過，她還是報了名去上課。第一堂，她便覺得，「呢個就係我要嘅嘢啦」。 所謂「園藝治療」，意旨透過園藝活動，造就出「治療的程序」，從而改善社交、情緒、身體、認知、精神等。例如，對於手部乏力的人，可以透過剪葉訓練手部肌肉；腦退化症的病人，可以透過定時淋水，增強他的記憶力；過度活躍的小朋友，透過種植的過程，又可以訓練定力。而對於成年人而言，接觸泥土、見證植物的成長，也能達到療癒心靈的效果。香港園藝治療協會為園藝治療設立證書課程及註冊制度，完成課程後，可註冊成為園藝治療師。Jenny已經完成大部分課程，並已註冊為園藝治療技術員。 這段時間，Jenny去過不同社福機構實習。有些初次接觸園藝治療的老人家，一坐下來便倔強道：「我屋企無窗太陽㗎」、「我種完我都唔攞返屋企」。Jenny苦口婆心，教導他可以帶植物落街散步曬太陽。他最後竟然成為最投入的參加者，不但主動和其他長者分享種植心得，更把長得美美的植物拍下來傳給Jenny。她又曾教一群空巢老人以乾花製心意卡，寄給已經移了民的子女，「當我哋知道呢班老人家需要乜，我哋就會設計啲expressive嘅work畀佢哋抒發一下，當然可能就咁種嘢有收成都會開心」。Jenny確信，植物能夠改變大家的生命，儘管只是一點點也好。 ｜慢活 vs 快活 眼前的Jenny，生活放慢了下來，訪問當天她穿上一襲白色長裙，笑容和藹可親，一雙腰果笑眼讓人感到無比心安。遙想起年輕時搏殺、狂歡的時光，她說：「依家年紀比較大，覺得個人平靜啲，呢種開心係比較internal，舒服啲，反而唔需要咁嘈。」 有時候，Jenny到不同公司辦員工team building的工作坊時，她亦感覺到大家都處於低氣壓，「我接觸大部分人都係唔開心，有唔同程度嘅唔開心。可能以前大家話題都比較輕鬆，討論玩樂多啲，依家煩惱嘅嘢會多啲」。早前她又辦了一場「香草領養」，一個個小盆栽上，放了一些小卡，盼香港人「保持戰鬥力」，「Please don’t die」。她又自行設計盆栽，例如生態瓶或苔蘚球。 現在，Jenny的家有一個小陽台，每日早上，她都會去看看自己的寶貝，「坐喺度發呆，然後睇睇要唔要淋水，好似有啲嘢要記住做，但係好自然嘅，我覺得好healing」。和煦的陽光灑在植物上，同時也灑在Jenny的臉上。一切或許如Jenny所說，「我們會變得更好的」，相信這句話，並不會只是遙不可及的盼望。 In ACOO, you can see #ACOOPerson @plantistory_ #horticulture #horticulturaltherapy #園藝治療 #植物療癒