OASIS｜余拜仁：你起咗筷未？

當通關安排都大致完全打通，香港社會都可以話係真正復常，於是乎近日走到街上，大家都可能開始覺得人頭湧湧，有啲返到以前旺區經常出現人車爭路嘅盛況，同時戲院又好、劇場又好，紅館更加係唔駛講，基本上唔同嘅演出都係場場爆滿，演出長做長有，其中近日最爆紅，買飛買到最多怨氣嘅可能就係「神神聯手」嘅《愛我別走》，雖然票務系統今次係相對暢順，唔駛由朝到晚「321」倒數，或者全日手動F5，但係當你見到自己個籌係排到十幾萬、廿幾萬，甚至六十幾萬，其實都係同樣萬念俱灰，繼續嘆句「睇場騷姐」。 《愛我別走》之爆，絕對不難理解，就算咩都唔計，單係一個「子華神」已經夠晒號召力，適逢佢本尊呢排都係紅運當頭，繼《飯戲攻心》後，另一擔大旗之作《毒舌大狀》繼續大破紀錄，就算明明係沉重而認真嘅正片片種，放喺農曆新年合家歡檔期一樣遇神殺神、再闖高峰；就算坊間偶有評論指電影「只係爽片一套」，以至部分法庭情節「離地」，結局放諸香港現今社會實況，更加似係睇緊「科幻片」，一樣無礙票房屢創新高嘅凌厲走勢，於是，部分觀眾睇完林涼水都仲未夠喉，想走入劇場睇埋黃子華去做一個同Time Traveler有關嘅舞台劇，都係情理之中、自然不過。 同時，香港劇場其實都好多元同繽紛，除咗《愛我別走》之外，仲有好多其他有趣表演節目可以選擇，《各位起筷》就係其中之一；不過，有言在先，嚟緊你睇到嘅並唔係一篇推銷Sell飛廣告文，事關截至開筆呢刻，一連16場演出嘅門票已經全部售罄，就算依家你想立即「補飛」購票入場基本都係無咩可能，不過睇完篇文至少你有機會認識多啲本地創作人同佢哋嘅作品，下次可能無咁後知後覺。 言歸正傳，《各位起筷》係由四位香港演藝學院紅褲子出身嘅演員聯手製作：麥沛東（麥東）、巢嘉倫（阿巢）、陳嘉威（Donald）同梁嘉進（Eric）；喺普羅觀眾眼中，麥東應該係最為人熟悉嘅，早少少時間上演嘅《媽媽的神奇小子》，佢係入面其中一位神奇隊友；呢一排叫好叫座嘅《正義迴廊》之中，佢係叫人「屈我啦，屈我啦！」嘅唐文奇，其他三位同麥東份屬同屆同學，功底紮實不在話下，同時四人早喺學校已經非常投緣，畢業多年之後始終堅持一齊搞一台戲，台上台下嘅默契都應該唔駛擔心。 功底扎實同有晒默契係一回事，作品好唔好睇又係另一回事，仲要睇番好多因素：「受惠於」疫情，佢哋有長達兩年時間去認真籌備今次製作，單係劇本都寫咗兩個截然不同嘅版本，呼應番時代嘅變遷，其中執筆嘅鄭國偉係非常資深嘅編劇，作品早已獲得不同殊榮，其中《最後晚餐》就以黑色幽默手法寫出低下階層喺生活中嘅掙扎，精準有力；至於執行導演一職就由新銳盧宜敬擔任，雖然佢前年先啱啱喺香港演藝學院畢業，但係已經憑住畢業作品《金龍》獲得校內傑出導演獎，並且同時獲香港舞台劇獎最佳導演（喜劇／鬧劇）同香港小劇場獎最佳導演嘅提名，令人眼前一亮，值得持續留意。 單喺牌面上睇，已經完全理解就算沒有鋪天蓋地宣傳，《各位起筷》仍然可以收穫一票難求嘅佳績，所以睇緊篇文嘅你，今次走寶都唔緊要，下次帶眼識貨就好。