做利物浦球迷，其實，一直幸福。

計成績的話，有一段很長時間，身陷黑暗期。但做人不可能樣樣事也只計較成績。巴塞隆拿曾被稱為地上最強，生產過無數球王球星，是直到近季，表現才有所下滑。美斯被踢走後，今季一度崩盤，但沙維甫接手，已經迅速止跌回升。球迷應該很高興才對？歐霸盃八強次回合，返回魯營主場，面對德甲中游分子法蘭克福，無論以任何比數取勝，也可晉級四強。正常來說，在主場球迷打氣之下，巴塞隆拿出線呼聲高唱入雲。結果，現場居然有一半球票落入法蘭克福球迷手上，客隊聲勢比主隊更強勁。巴塞隆拿最終輸二比三，爆冷出局。

輸波不能賴球迷少。不過，在自己地頭，聽不到第十二人的打氣支持，也實在氣餒。或者，之前幾十年，贏得太多，巴塞隆拿球迷根本瞧不起區區歐霸盃，懶得入場，不如把波飛套現好過。利物浦球迷早早拋開類似包袱，今季季中，即使千辛萬苦只不過捧走盃仔聯賽盃，也不知幾興奮。咪容易開心囉。

這種開心，建基於忠誠，建基於投入，建基於不離不棄。英格蘭足總盃四強戰，利物浦又抽中對曼城。在以前，溫布萊球場是決賽專用，足總盃四強，多數安排在維拉公園或奧脫福的中立場。現在，溫布萊經過重建，用得就用。偏偏賽期撞正復活節長假，鐵路展開工程，曼城與利物浦直達倫敦的火車服務停駛，兩地市長曾去信足總，要求把比賽場地調上中部或北部，方便球迷，不果。利物浦球迷的反應是：「哦，咁咪早啲出發囉。人人都行同一條高速公路，人人都去嗰幾個服務站，一定塞車，一定要預留多一點時間先確保不會遲到。係呀，足總兩年前已經知道有工程，依然堅持用溫布萊，係好痴線。足總就係咁㗎啦。不過，年幾兩年前，我哋仲喺度諗幾時可以入返球場，而家爭四冠王喎，仲有乜好投訴？瞓覺？暑假咪大把時間瞓囉。」足總分給利物浦球迷的三萬五千張門票，一下子賣清光。

曼城呢？開賽之前，門票還有貨，由於球迷無法坐爆球場，為避免尷尬，利用一張巨型橫額覆蓋了一大格座位。現場聲勢，自然遠遠不及人強馬壯的對家。不知是否有種爭氣心理，在賽前默哀儀式進行期間，正在悼念希斯堡慘劇犧牲人仕之際，有曼城球迷竟然高歌，令球證只可被逼提早結束儀式，搞到曼城在球賽未完結，已經需要發聲明向利物浦致歉。

敵對球迷，當然可以互相嘲笑互相咒罵，不一定要客客氣氣惺惺相識。不過，有些界線，還是不可以踩中。曼城球迷可能覺得搭巴士落倫敦太辛苦，一個多月後，歐聯決賽，在巴黎舉行，如果球隊能夠擊敗皇家馬德里，再次打入決賽，他們又願意不願意搭搭飛機呢？