見到「Fight For」二字，你會諗起啲咩？一份前途無限嘅好工、盡快儲到首期上到車、得到心儀對象嘅青睞，定係完善選舉制度，加強保護國家安全？放喺唔同身分、唔同地位，以至唔同職業嘅人身上，大家爭取嘅嘢自然不盡相同，如果係一個流行樂歌手呢？有「隱世高手」美譽嘅陳柏宇（Jason）剛剛完成咗佢喺紅館一連兩場嘅演唱會，正正係以「Fight For ___」為題，其中「 ___」嘅自由填充部份實在係畫龍點睛之處，喺此時此刻嘅香港，我哋又有乜嘢需要fight for、值得fight for?

Jason「隱世高手」嘅稱號係幾年前由廣大網民賜封，「高手」當然係讚賞佢嘅實力，「隱世」或多或少係嘆息佢值得更多人嘅關注；的確，Jason一直以來都專注喺佢嘅音樂事業，並無好似好多同輩同行咁歌影視多棲發展，就連廣告代言都唔多見，全副心機都係放喺做歌、出歌之上，同時佢嘅演出永遠都係唔會令人失望，不但技巧充足，而且水準穩定。高手再隱世，始終都會得到有識之士嘅賞識同認可，2017年，Jason正式完成所有香港流行歌手嘅夢想，成功走上紅館舞台舉行一連兩場「陳柏宇Speechless演員會2017」。

要開一個紅館個唱，從來都唔係一個咁容易嘅任務，事關香港樂迷同觀眾一向受到嘅灌溉同培育，上得紅館，歌手總係需要飛天遁地、耍盡十八般武藝，噴火吞劍樣樣齊；對於Jason一個一直咁純粹地醉心喺音樂事業嘅歌手，難度都唔可以話唔大，但係佢都絕對係交足100分嘅功課，拿手好戲嘅專心唱歌固然絕無欺場，就連佢明顯唔熟練嘅載歌載舞場面，都一樣落力十足，直到演唱會尾聲，佢甚至滿足埋社會大眾對男歌手開個唱嘅「基本」要求：除衫，專業指數簡直爆燈。

4年後嘅今日，Jason第一樣fight for嘅就係一個佢心目中理想演唱會嘅模樣，足足整個上半場，佢完完全全係以歌會友，唔做半點多餘嘅嘢，專心唱歌，然後繼續專心唱歌，佢嘅歌聲當然仍舊係保持喺甚高水準，然後整個編排佈局更加係極具心思，由個人故事開始講起，並由成長階段中經歷過與至親嘅分別，逐步過渡到我城近年比比皆是嘅離合散聚，先見自己，再見眾人；神奇嘅係，以往嘅陳氏苦情情歌，今天再去細聽，竟也聽出其他更多意思，令人睇到更深意境：「要搬家，路上或更可怕；誰所有舊恨拒絕放下？誰亦有著缺陷你知嗎？」（《感情這回事》）。

不但係聽者有所感應，歌者都同樣深受觸動，「今天起各有逸後，如火花攜不走，無需要定擁有；曾相擁曾牽手，在心裡仍足夠，願我所愛以後帶著笑口便無憂」，唱到首本名曲《逸後》時，Jason更加係激動得久久未能平復，歌都唱唔到落去，觀眾一邊睇住螢幕放映著香港人過去一年半載都非常熟悉嘅離別畫面，一邊全場全情和唱，現場思緒濃烈而複雜；人生總有歡喜，難免亦常有淚，抹乾眼淚之後，Jason都繼續Fighting：「頭如何疲倦了也要抬得起，我就算沒有閃光燈被拋棄；生於寂寞世界更要強壯地，很尊嚴地和逆流做知己」，喺呢度都以Jason嘅《對得起自己》同一眾同路人打打氣：「燃燒的理想，明知不理想，仍必須衝上。」