去年，萬聖節期間，我問過自己一條好無聊的問題：「點解英國的小朋友願意扮鬼扮女巫扮木乃伊扮科學怪人，遵守傳統，不會要求扮Elsa扮蜘蛛俠扮哈利波特？」隔了半年，我好像找到答案。

早在一個月前，已經收到學校通知，三月三日是World Book Day，歡迎同學以最愛書本角色的造型上堂。當然不是強制性，你以為是檢測咩？不過，所有同學也改裝自己，只有你一人繼續著校服，相當突兀。入鄉隨俗，點都要花花心思。

我尊重當事人意願，問大女：「你想扮乜呀？」她想也不用想，便答：「Hello Kitty！」尷尬了，Hello Kitty算不算書本角色？全地球所有商品，也好像見過Hello Kitty版，有沒有見過一本Hello Kitty小說？我很守規矩，反問女兒：「不如，扮哈利波特啦，或者灰姑娘？白雪公主？神奇女俠？」她聽見建議，幾乎想立即哭出來。我知道，不讓她扮Hello Kitty的話，會留下心理陰影，會怪我一世。

只好說服自己，就算Hello Kitty無出過小說，甚至無出過漫畫，至少肯定出過筆記簿，唔係書本咩？臨到三月三日，行超市，World Book Day也是一門大生意，有個專屬貨架，售賣不同服裝。真係書本角色，竟然是《朱古力獎門人》的Willy Wonka，或者是一排朱古力，又或者Dr Seuss繪本不同角色造型，相當符合要求。搞到我怯一怯，回到家，再次向女兒提出建議：「喂，扮Hello Kitty真係唔係咁好喎，香港人，不如扮《神鵰俠侶》？最多唔使你扮隻鵰，我按照李若彤造型，幫你扮小龍女？」當然沒有下文。

到三月三日朝早，準備就緒，一出街頭，顧慮已經一掃而空。基本上是一個大型的化妝舞會，是見到有小朋友扮小熊Paddington，有小朋友扮《小飛俠》入面的Peter Pan與Tinker Bell，百分百標準，不過，八成還是超級英雄、公主，我甚至見到有好幾個Minions。跟在香港的萬聖節，沒有太大分別。扮Hello Kitty不會有違和感，就算扮電玩遊戲入面的孖寶兄弟，跟書本接近零關係，也不會有人投訴。

老師也投入，以《綠野仙蹤》入面的Dorothy、獅子、鐵皮人造型返工。玩足一日，學生當然開心，除了嬉戲，也真有教育成分，老師會跟他們講述書本的重要性，跟他們一齊閱讀，諸如此類。或者，回到家，我個女還是立即拎部ipad出來打機看卡通，不過，潛移默化，在紙本式微的時代，盡力讓新一代明白讀物的可貴，總勝過甚麼也沒有做。

忽然之間，覺得自己都不是太笨。我一家四口，只運了三十箱雜物過來，大型傢具、電器、過氣衣物，賣的賣，送給人的送給人，只是堅持把陳年小說與漫畫原封不動搬過來。有時，我也覺得很傻，上一上網，便可放齊入平板，根本不用千辛萬苦十箱八箱浪費空間。我只是始終相信，肯一頁一頁一格一格看完整套《男兒當入樽》，你便自然明白如何做到一個好人。願有朝一日，我個女會跟我要求：「World Book Day，我想扮櫻木花道！」