今日係大年初四，唔少人都已經要開番工，Weekend前夕都要返一返，公司入面可能都充斥住唔少「初四咁嘅樣」（當然呢個時勢仲有工開，又或者都唔應該會有太多怨言），另一方面更多人可能都提前拎咗假，放自己一個悠長農曆年假，直至下周一初七人日先邊慶生邊復工，不過無論假多假少，大家普遍都有一個共同命運：無咩好做；根據非正式統計，過去三日入面，出街嘅往往離唔開行山或者購物，留家嘅基本上就係打牌同埋煲劇。講起煲劇，如果讀者有啲啲印象，前一期嘅呢個專欄就係以鄧麗欣（Stephy）為題，講起唔覺意睇咗ViuTV嘅《男排女將》，深深被佢精湛嘅演技吸引咗，然後年假期間終於睇晒前後二十集，發覺Stephy原來都係眾多好睇元素之一而已，呢齣劇係絕對值得再書一筆。

《男排女將》顧名思義就係去講一班人打排球嘅故事，不過就算觀眾事前完全唔識打排球，又或者根本連睇都未睇過排球，都唔太影響佢哋嘅接收同閱讀，一來故事係講一個好有經驗嘅女將帶住班新仔打波，中間好多劇情都會交代到男排們其實係仲有好多嘢要學，而喺劇情發展之中，部份場口直情會畫晒教學圖，幫觀眾一步一步了解排球嘅基本運作，安排非常貼心；更重要嘅係，排球其實都係一種象徵、一種代入，劇中主人翁面對嘅種種人生議題，其實都係世界大同、宇宙共通，真係「是他也是你和我」嘅生活處境。

例如女將Stephy面對嘅事業抉擇：全心全情全職教波好，定係邊做保險邊教波好？一個選擇就穩陣啲，對生活有保障啲，有咩意外都不致Total loss，心底入面嘅聲音卻又會質疑自己，如果真係鍾意一樣嘢，點解唔畀個機會自己全力一拼呢？男排主角都係一樣，由細到大都想成為一個出色嘅主攻大鎚，明知自己先天不足、身材矮小，就正方偏方乜嘢都試，只求圓夢，但係去到一個殘酷現實位，就係無論你點努力，好似都再無咩進步，反而轉打另一個主守自由人位置，憑住本身移動速度快，又有打不死精神，發揮明顯嚟得更好，兩者涉及到唔同嘅層次：現實同理想之間，你會點揀？喺尋找理想嘅過程入面，現實話俾你知有啲嘢就係唔啱你，你仲可以點？又假如「好想做嘅」同「做得叻嘅」不幸地唔係同一樣嘢，你又要點做至好？

可以咁講，《男排女將》當然係關於排球嘅劇集，同時佢探討嘅亦遠遠超出打唔打排球同點樣打排球嘅呢啲範疇。所謂好嘅創作可以有好多唔同類型同層次，有一種係帶觀眾去到超越現實經驗嘅境地，無限延展嘅想像力完全令人驚嘆，包括大量科幻經典，另一種則係取材自日常生活、呼應住生存狀態，共鳴感非常強烈，《男排女將》當屬後者之列，佢選用咗輕鬆嘅手法去講你我完全可以有唔同嘅存活態度，喺大家都面臨住好多唔同選擇嘅今日，除咗可以睇下Stephy同鏡仔，都係一趟唔錯嘅自我檢視旅程。