每個人都有做判官的時候，狗主睇貓奴、的士司機睇小巴司機、任何人睇其他人教仔、巴膠睇鐵膠、再為鐵膠平反然後發現全部人都係膠…… 但睇自己呢？最顯露人性就係春夏之交換季之際。

你望住自己買嘅衫，望住連綿夜雨，望住其實自己得三格櫃桶加一條衣櫃，頂多加個已經塞滿嘢嘅床下底，你點面對自己，仲要係剛剛嗰兩三個月嘅自己？

當然，物理上嚟講，拎幾大體積嘅夏天衫出嚟，放返幾大體積嘅冬天衫入去就得，但行禮如儀都唔易，當兩件衛衣都已經成個微波爐咁大時，呢個節奏係不可能平衡的。

Olivier Cong – “The Emotion”

“A rock on my chest

Its getting hard to breathe

It turned into a mess

I wish you’ve found a way to leave, to leave”

然後去首歌7’30”，由個琴左右手之間的追逐，加支結他、加埋個鼓已經好痛苦，個BASS再走埋出嚟，你完全會不其然唱出江逸天嘅哀號，啊啊啊～

好啦，哀號完咪又要執，不如樂觀少少咁面對。“Keep clean ambassador Ah Tak” 呢首採用TRAP咁曳嘅曲風，配搭極度正面嘅內容，鼓舞人心同時又維持尊嚴，其實同江逸天成日話想表達對立又共存嘅狀態如出一轍，speed up部份仲可以鼓勵自己加速添。

清潔龍阿德-“Keep clean ambassador Ah Tak” 

“我個名叫Keep Clean Ambassador

保持衞生 咪再話等 Later

講咁多嘢 都係想大家 Remember

清潔香港 Together”

Ambassador有排未到你，但執執吓總會有D reminder揾咗出嚟，一D好貴但成季都無著過嘅衫，而且可能買咗唔止一年，因為買完無耐就唔啱著，但每次換季都會覺得自己會喺未來幾個月內著到，日復日、年復年，或者你心知其實件衫同自己嘅體型發展不會再有交集，呢個時候響起回不過去的哀愁。

My little airport-“那陣時不知道”

“那陣時不知道

置身的日子都發亮

眼光裡藏著的囂張

往後已不再同樣”

成日話斷捨離，唔好留戀同執著唔等使嘅嘢，話咁樣個人就會活得輕鬆自在，但唔再執著一啲事換來的自在其實唔會長久，甚至瞬間表面上的解脫，會因為釋放咗空間而空虛咗，於是又再揾嘢填補。

Neurotic WKY- “快樂頌” 

“教我分辯是非　冇錢要學識自卑

自卑既你就只能夠欺人自欺

自欺欺人能夠欺騙到只有自己

自己欺騙到自己就能克服自卑

自卑既話就用物質將你時間塞滿

塞滿之後點解依然有人感到不滿”

唔開心去食好西、買好西，如果消費解決到嘅問題就唔係問題。只是春夏之交一到，你又會跌落去嗰個深淵。

斷捨離好好、消費帶動經濟好好，一旦你覺得唔好，就可能要聽吓本地indie音樂告解。很喜歡Bad math 的”別”，是分別(differnent)、告別(farewell)、別(don’t)的過程。