逢親有港女話去「食 High Tea」，好難忍住唔反白眼。

唔該，三層塔小點心嗰種叫做 Afternoon Tea，亦稱為 Low Tea ，皆因通常坐喺茶几邊食嘅，即係Downton Abbey 嗰隻。High Tea 其實係在飯桌食個正餐，只係以茶代酒，D H Lawrence 小說就成日提住，講嘅都係礦工呢啲勞工階層，晚飯從來唔會話食Dinner 而係 Tea。你一個詞就露晒底乜High都唔識。

品味嘅嘢，唔係話要講究拎茶杯尾指係咪伸指，亦唔一定要要先焚香沐浴至識欣賞，日常生活細節灑幾滴，都可以唔扮嘢咁提升吓修養。

行商場諗住買少少嘢，未入門就見到個亭，綠底彩點水磨石，細個行公園嘅感覺返晒嚟。行近啲睇吓，原來係本地室內設計師 Joyce Wang 嘅手筆，仲要唔係齋懷緬一番咁簡單，邪惡嘅曲奇雪糕三文治口味特別，忍唔住隊咗件，望住維港諗吓我城變遷，都咪話唔疏肝。

以細節體會香港變遷，呢個裝置主題「夾夾糖店」，喺香港曾經梗有一間喺左近，嗰種千種百樣多少隨意嘅自由，到而家都可謂消聲匿跡，身處色彩斑斕嘅開心環境，重溫拎住個夾選擇困難，都咪話唔唏噓。

帶住雪糕和橡皮糖嘅sugar high，超鍾意九曲十三灣去到地庫呢個多媒體展示。唔使有乜嘢高深嘅修為去欣賞，單係如夢境嗰種零碎切割嘅感覺，完全唔使用系統咁分析，在漆黑中只需用五觀感受就好，個腦自然做嘢帶你去潛意識到 free style association，呢個算全場最 hard core 嘅藝術，都唔算曲高和寡吖。

幽閉環境內觀感轟炸一輪，到室外抖吓氣，華燈初上嘅大廈圍住隻又噴煙又閃燈嘅「太空船」，嗰種好切身又好遙遠嘅科幻感，加埋太空船內世界光影相必定靚，確係有衝動撲上去打個卡嘅。但草地又圍住晒，影緊相嘅人又好似係工作中，不敢造次問問工作人員，原來係作者 Nelson Chow 本人拍造型，而草地又做緊保養所以圍住。不過遲啲會開放俾觀眾近距離親親，希望下次過嚟唔會向隅啦。

講科幻講未來，NFT 呢種新興藝術，點解無實物都賣得咁貴，真係唔明點解，但係日本藝術家空山基嘅兩條短片，金屬冷硬反襯鯊魚游弋動作嘅靈巧柔軟，就真係咁 loop 都令人睇唔厭。話晒係佢首次玩NFT， 順手參加抽籤，得手就可以幾百蚊美金扮吓「藝術品投資者」，唔單止分分鐘以少搏大賺到錢，仲有啲原動力去研究吓NFT究竟係乜嘢，吹水時叫多個話題無咁悶。

而最好彩嘅，可以話可以獨佔呢個瀑布房。地方細細，簡單兩分鐘條片，聽住沙沙嘅水聲，望住鏡子無盡倒影，心內一片寧靜澄明：究竟乜嘢係真乜嘢係假，邊度係源頭邊度係結尾，專心行藝術館定係購物其間充個電，已經不再重要。