1997年，Annie出生，皇都戲院結業。兩者看似完美錯過，卻又存在某種緣分。

大學畢業不久的Annie，熱愛文化保育，順理成章到了皇都戲院擔任歷史體驗活動導賞員，化身戲院票務員，為「觀眾」劃位、查戲飛，一邊講解歷史。說起皇都，原來跟年紀輕輕的她也不無淵源。準確來說，是跟她的「前世情人」有段故。

Annie的爸爸媽媽，當年住在北角油街，是皇都戲院的常客。從拍拖到結婚，都在皇都留下足跡。「佢哋話當年戲院唔多，皇都戲院好大，有成1300個位。唔似而家啲新戲院，好似板間房咁。最記得喺皇都睇過《半斤八兩》。」皇都戲院見證了港產片流金歲月，《半斤八兩》是70年代最賣座的電影，票房打破開埠紀錄，手繪海報現時也在皇都展出。Annie娓娓道來父母的故事，說觀眾以前會買水果和栗子入場，邊看邊吃，80年代戲飛已經要20多元……

然而，Annie對皇都的最大感受，並不止於父母「拍拖勝地」，而是皇都戲院的前身——璇宮戲院。璇宮戲院由歐德禮（Harry Oscar Odell）於50年代創立，矢志用頂尖的場地和技術，推廣西方藝術文化及電影娛樂。當年不少國際著名歌星、藝團都曾在璇宮演出。「最感觸係一個外國人，花身家喺國際表演、香港電影。如果冇佢，就冇皇都。我同爸爸媽媽講嗰陣，佢哋都覺得好神奇，佢哋都唔知道璇宮創辦嘅歷史，我仲熟過佢哋。」

24年前跟皇都完美錯過，今天將歷史重現眼前。「我覺得，博物館或者保育，唔係就咁隔著玻璃睇舊嘢。重點唔係守舊，而係保留咗珍貴、值得欣賞嘅地方，用互動方式展示，啟發到人。」

一次「尋找你我他的皇都」的代入式歷史回顧活動，令Annie有機會重臨皇都。皇都戲院的復修保育計劃亦即將展開，由新世界率領一眾國際級專家主理，復修後皇都是否會更加精彩，也教人期待。