2022年11月12日，水野月的第一條分半鐘直度片面世了。那條片有3萬多views，為水野月IG增加了1000多個追蹤。潮心想：「假如我有30萬views，豈不是有3萬個粉絲！」

「驚艷別人」的感覺，讓潮十分享受。「好簡單，你攞起手機，開Instagram上嘅reels專頁，你碌來碌去，你碌到幾多個先會見到一個香港（創作者）呢？香港人好急躁，大家都想喺幾十秒之間得到一啲嘢，可能係哈哈一笑。我哋可以喺好短時間內，話畀觀眾聽一啲嘢。例如，阿潮呢個人好搞笑！或者，阿潮講呢番話好有道理！又或者，阿潮講呢番話，合情合理之餘，我估佢唔到！」他又為「水野月」這個名字下了一個官方註解：「潮拆開，就係水同月。我希望我嘅作品，能夠畀人好似喺野外聽住水聲、望住月光睡覺一樣，感覺係好舒服嘅」。

「我哋嘅初心係，拍長啲嘅話成本會好高。仆街！既然我無錢，就打直拍、晚上收工之後拍，我哋拍reels，最最最最大嘅原因係我哋窮，窮，就係我哋成功嘅方程式」。

文：Heidi Wong (@heidi.is.strong)
圖：hct、Kelvin Or (@kelvin.okc)

Stage 4：一個衝動的決定

眾人聽到潮想拍「直度」片，大驚，猜想潮是在搞笑嗎？哪有人把電影打直拍？細豬（水野月的常駐演員）叫他不要急，慢慢休息多一會再算，但潮心意堅定：「我要生活，我要用拍片呢件事化為收入嘅話，我係咪都要拍直度片？IG依家有呢個新功能拍直度，我覺得要把握呢個機會，我覺得可以hit。我依家唔做，出年才做就太遲啦」。

潮經朋友介紹下，認識了Alex，也就是現在水野月的主要攝影師。

Alex在中學時候已經參加拍片比賽，中六便自己寫歌、錄CD，大學成功考入浸大電影學院，但一直自覺從沒被認同過：「我會諗係咪自己嘅性格有問題？嗰陣嘅我好固執，不斷同其他人比較，覺得只有自己係啱嘅」。

潮和Alex，兩個人都是「固執底」的人。儘管Alex曾苦口婆心叫一直喜歡自導自演的潮別當演員，專心做導演，潮一度怒羞成怒：「以後唔預你玩！」不過之後二人竟然有點「一拍即合」。

Stage 5: 橫變直的神奇旅途

潮躍躍欲試，大家找了一個晚上，拍了3條reels。

一開始，潮參考其他地區的短片，拍攝「現實世界」及「電影世界」的對比為題材，後來他稍稍微調，改為「普通人」對比「電影人」，例如普通人在麥當勞重遇舊同學，潮會說「人哋當然唔認得你，佢食安格斯餐，你食豬柳蛋咋！」；電影人在麥當勞重遇舊同學，燈光一轉，音樂響起，劇情同樣是被舊同學忘記，潮「chok」起語帶雙關對白：「有時候有啲嘢，就好似麥當勞嘅豬柳蛋一樣，整定嘅。」

電影人真的都是傷春悲秋的「chok」、懶感性？網上有人質疑潮根本不算電影人，潮說：「我又真係唔算電影人，我係自由工作嘅影片創作者」。事實上，潮其實只是想表達出看待同一件事情，兩種看法的對比，並透過畫面呈現。他解釋：「喺故事、音樂節奏、戲劇性方面，普通人就係好戇鳩，電影世界演技好嚴肅；普通人世界係用手機拍攝，電影人世界用電影機拍攝；普通人世界無調色，電影人世界有3級調色；現實世界都有收音，但只係手機收音」。

漸漸，水野月followers幾何級數上升。就算你沒有follow他們，你或許都會在reels頁面見過「普通人唔要膠袋VS電影人唔要膠袋」，或者「普通人flirt女VS電影人flirt女」，兩者分別有258萬及302萬views。記者忍不住問道，你們的作品吸引人的秘訣在哪？Alex說不是不能說，而是「難以言喻」，「簡單而言就係準繩度。」

記者問道，做直度片，不怕被批評？潮爽直回答：「連登畀人屌緊啦！不過唔打算縮，點解直度片就一定係抖音片？因為抖音拍直度先？我覺得唔係，我覺得自己拍嘅片，係香港IG片」。

Stage 6:還記得初衷嗎？

訪問當天，這個16萬追蹤的IG創作者，去了酒店做兼職bell boy，全日都因為收到了5元歐羅的小費而喜滋滋的：「我得閒就會返工，你喺屋企坐低諗劇本，無錢；我返工嘅時候諗劇本，係賺人哋錢做自己嘅事！」

潮除了自己工作，水野月目前亦透過接一些業配工作賺錢。要努力儲錢，是因為潮還有一個終極目標：「我本身諗過reels唔會hit，如果係，我會儲20萬，我會寫一個好撚究極嘅劇本，一個我覺得拍咗出來我肯定會獲獎嘅劇本。接到廣告唔係我哋嘅終點，電影係我哋嘅終點。由直到橫係我哋嘅終點」。

潮盼著，有一日可以製作出一部足以參加國際電影節的作品，告訴大家，馮錫潮不只是一個會自導自演的MK仔演員，也是一個專業的導演。記者很好奇，究竟在潮及Alex眼中，reels的意義只是工具，還是他們同樣鍾愛的東西？潮想了一想，說：「短片都係我導演出來，呢件事係從我角度出發，我兩樣都好鍾意，道理等於你食咗好多雙層芝士安格斯後，你都會想食一個12蚊嘅魚柳包。佢對於旁人而言可能無乜味道，可能唔夠多汁，但佢對我而言好重要」。

偶爾夜闌人靜時，潮會想，要是有人訪問自己，標題會怎樣寫？「24歲無業青年 6年後堅持夢想」這樣？「我真係無任何background，我嘅background就係24歲無業青年，街童。」今天，這個24歲青年果然真的接受訪問了。他依舊稚氣，有一點點任性，偶然自負，偶然自卑。不同的是，他已不是單單是一個無業青年了。

歸根究底，這個故事其實可以簡單以一個字總結——愛，不論是潮對於夢想的熱愛，抑或這群原本被看不起的人，聚在一起的情感，「一切嘅動機都係愛。」潮說。

後記：悲慘的定義

在訪問期間，不難感受到潮其實並不富貴，甚至可以說是「草根」。有人問潮哪來的錢拍攝，潮在訪問完結後，分享了一個故事：

「記得有一日，我飲醉酒行過屋企附近，見到一個流浪漢。因為經常見到佢喺我屋企附近執垃圾食，嗰陣我覺得佢好慘，我因為醉意，真係問佢，喂，你覺唔覺得自己好慘？佢話，你就慘，傻鳩！」

「過咗無耐，我因為拍片，將自己嘅錢用得七七八八，我同我好朋友傾，我話覺得自己無錢好慘。佢話覺得我一啲都唔慘，因為起碼我係做緊自己鍾意做嘅嘢，但佢唔係。」

「然後，我就諗，其實一個人畀人覺得佢好似好慘嘅時候，佢未必真係慘；但如果有一日，佢都覺得自己慘嘅時候，佢先至係真正嘅慘。」

在這個社會，大家可能都會覺得營營役役的自己是一條可憐蟲。忙時，不妨歇下來想想，自己有否逐漸遠離當初想像中最美好的自己？

假如一切其實都在進程中，或許現階段這個困苦的你，也是閃閃發亮的。