細聽少爺占（占）過往的填詞作品，2009年的一首《憶年》，已經寫了「和校友講再見離開/夢想千里遠之外/老友移居海外」、「圍住了口罩過寒冬/隔開擁抱那衝動/世界如此轟動」。怎麼放在現今聽，竟毫無違和？何兆基 （阿叔、Chris）認為：「其實呢個世界只係不斷重複，只不過人類喺不斷重複之中，去做多一啲嘢，或者進步咗少少。」

占與Chris從野仔結緣，今年組成二人男子組合「YEAHS」，10月開演唱會，暫時推出3首歌，講生命、講關係、講心中的小孩。「我哋以前嘅定位就係情懷嘢，依家想寫啲大世界啲嘅嘢」，少爺占說。

的確人生在世，沒有甚麼是可以永恆不變的。人會成長、親友會離開、社會也會變遷⋯⋯或許占與Chris的歌曲創作風格亦然，只是萬變不離其宗——到最後，占與Chris其實只是想做一個與聽眾「一齊喊、一齊笑」的人。是的，一切就是如此簡單。

文：Heidi Wong @heidi.is.strong
圖：Mak @iunyi_

｜YEAHS的緣起

今年2月完成艾粒20週年演唱會後，占迎來一段「創作真空期」。占一直喜歡夾band，心底裏始終認為一人創作是孤單的，「我想做一樣野，係可以傾、砌出嚟，好似一齊玩煮飯仔嘅感覺」。剛巧那陣子他被泰國二人男子組合HYBS吸引，自稱「貪玩的水瓶座」的他問早年已移居加拿大的Chris：「做呢啲難唔難？」阿叔一貫口吻答：「好易啫！」「幾萬蚊搞得掂？」「都，OK嘅！」

「活到呢個年紀，好多人都會覺得，安全啲啦，唔需要咁搏啦？但我覺得，任何年紀都係一個數字，不如試吓啲新嘢得唔得？」占反問自己。二人於是從組合名字開始著手，YEAHS，代表爺絲（占的粉絲），原來也可分拆為「YE」及「AHS」，前者為「爺」，後者是「阿（AH）+叔（S）」，「但好多人searchs都唔識隔，所以壓縮返一齊⋯⋯」。

「當然，我哋都覺得個名幾有型。」

事情就是如此開展。

｜序幕：Singalone song

今年年初，占把以前填詞的作品整合，一次過簽給一間版權公司，「然後我發現，原來我已經有百幾首歌，咁多嘅！」他思索着：「既然我開一個新嘅project，喺個show會唱以前嘅歌，不如將佢放落一首歌，去喚醒大家，同埋我自己嘅記憶？起初無乜包袱，打算唔派台，單純放串流平台，所以就做咗《Singalone song》，一首很長，無乜包袱，又無乜重複歌詞嘅歌。」

如何用一首歌，包裝過往這麼多的作品？占回想，自己很多的歌曲都在講成長、講回憶，而這一切，似乎都係來自他「孤單」的感覺。或許因為自己是獨子，在比較孤獨的環境長大？他亦特別點出歌曲最讓他「吉心」的一句歌詞——「人生就係一個人嚟/走嘅時候都係一個人離/開」。他解釋：「依家你聽到，除咗係老走（死），都會聽到突然間病；第二個『走』嘅concept係，呢幾年好多人離開呢個地方，佢嘅走唔單止係佢走咗，離開呢個地方，佢係『帶走』埋你同佢嘅回憶。」

忠實粉絲細心聆聽《Singalone song》，大概都能不斷找到很多少爺占填詞的歌詞，例如「回看那十幾的我/仍像片白紙的我/你我青春的時間/派對始終都要散」（《柚子》）、「我要把這記憶留起/舊有粗糙記憶今天都很細膩」（《相約在八王子》）等，不能盡錄。你又找到了幾多首歌？

｜期盼着故事待續

雖說你我是一個人來到世上，又一個人離開，但人生路上，也總不會是永遠孓然一身。

YEAHS的第二首作品，名為《下一世つづく》。「つづく」，意指「未完待續」，常看卡通片的人，或許都對這個日語字符不陌生。占笑說：「究竟足球小將個波幾時會踢入龍門？下星期就會踢啦！但點知起碼4集！埋門一腳啦，都係未係會踢入去！」

未完、待續，說的是一種期盼：「以前睇日本卡通片，下面有個つづく，幾正啊！因為你永遠有個期待嘛。無人會講你知多啦A夢結局係點，呢一個係永遠無限延續，龍珠都係永遠無限延續，JoJo的奇妙冒險永遠都唔會完。但呢個感覺就係畀細路仔一個好開心嘅感覺，因為係唔會停嘅，唔會完嘅，人生有啲乜係可以永遠都唔會完？」

人生路上，不同的關係緣起緣滅，很多人或許覺得這首歌只適用於情侶、夫妻，但占說，其實它在說任何關係，「呢首歌唔單止係寫畀我太太，雖然開頭幾句係『從小就結識/同一樣記憶/早已沒計日期』，好似因為我哋從細就認識咁。但其實依家就算嗰個人未出現，佢等緊你，都係一個希望。你代入寵物又得，佢從小就結識你啦，同你一樣記憶，早已沒計日期。所以就有呢個無限代入。」

今生緣盡，道別過後，你怎知下輩子彼此會否以其他方式再相會？

｜像初生之犢般無畏無懼

近幾年，少爺占開始有個有趣的想法，認為人分為兩批，「一班人，唔需要結婚，唔需要有小朋友，可以有好多男女朋友，可以花天酒地。以前你識落佢10幾歲，可以4、5點瞓，依家佢都可以4、5點瞓；呢幾年認識第二批朋友，同我20幾年生活差唔多，從4點一直褪，依家12點幾1點就瞓啦，注意健康啦，有小朋友啦，開始向一個so-called正常嘅生活進發。」

占發現，這兩群人，都有個「小孩」，前者是內心有個小孩，後者是真的養育一個小孩。

先是有了這個意念，後來，占留意到自己的兒子會「呢吓同人鬧交，嗰頭同人攬頭攬頸」，「因為佢個世界pre-set係開心嘅，我出得嚟行 ，就係玩㗎咋嘛；但我哋依家長大咗，就會一開機就彈啲唔開心嘅msg出嚟」。他又想起自己常在網上看到哪個哪個明星歌手，告訴大家「以前我睇乜乜乜forum平台攻擊我，但我都學習唔睇啦，開始唔理呢啲嘢啦。」於是，他把「細路仔concept」放進去第三首派台歌《我內心強大的小孩》，「我就想將呢個概念畀嗰啲成日被人攻擊嘅人，只要你內心有個小孩，就可以對抗所有內心嘅侵襲。」

野仔常被認為以「情懷」為定位；現在，占希望寫一些回應「大世界」的作品，「呢首《我內心強大的小孩》，好似係好細嘅，縮喺心裏面嘅，但我意思係，佢係外向地有一個好強大嘅氛圍喺自己面前。我以前可能會寫收喺心入面嘅強大，依家我係會叫出嚟，話『絕不會說害怕/絕不會被溶化』。」

｜同你一齊喊 一齊笑

過去少爺占以多個身分示人，你第一個畫面想起的是甚麼？是與當奴二人搞搞笑笑、偶爾又令人「眼濕濕」的艾粒？是熱血的野仔？還是嫵媚的朱豔強？占自己最喜歡、最珍惜的是「唔會再返嚟嘅朱豔強」。

2021年，疫情稍微緩和，某些表演場地重開，占想做一些事情cheer up自己，所以「問米」邀請朱豔強重出江湖，「大家戴晒口罩，好慘，只係台上呢個可以唔戴，但係好開心，大家見到朱豔強係好開心，好似真係做咗一件好事。」

這也是占覺得現在的香港人需要的東西，一個伴你同喜同悲的人：「呢一代香港人需要咩歌？我覺得都係心靈系啦，其實呢樣嘢，真係未有任何事情發生之前，方皓玟都已經寫緊，只不過近年更多人寫。或者香港人都係需要心靈派啲嘅歌曲，一係你就好心靈，一係就完全純粹係Pink Venom。即係無任何包袱，其實唔需要知道唱乜，只係佢跳嘅時候你好欣賞。」

「另一種就係，你同佢（歌手）一齊喊、一起笑。」

今年10月，你預備好與YEAHS一同分享喜與悲了嗎？

商台製作、寰亞娛樂主辦
叱咤903 都係爺絲
《When We Were Wild Live 2023》
日期： 2023年10月6至7日
地點：九龍灣國際展貿中心 Music Zone
時間：20:15
票價：$580 (全場企位)
門票8月23日上午10時於Cityline公開發售
Special Performance：
– ROCKLUB A.K.A ドナルド T + ジム Y
– FOOL YA! 虎牙A.K.A 阿正+梁子
– before the night ends
– 支力會 A.K.A 薛晉寧

Venue: 心烤 大眾酒場 @somehowizakaya
Styling: Sara Li @saraliboyi
Makeup: Krisie Wong @krisiewongmakeup
Hair: Johny Wu (Hair Corner at CWB) @johnywy
wardrobe: hbx @hbxhongkong

｜後記：幾時會死？

在觀眾眼中，占的形象永遠年輕，分明也就是一個小孩吧。但其實在Google見到一search「少爺占 年紀」，維基百科立刻顯示答案，46了，整件事冷靜且殘酷。

占亦說自己人生已經出現無形的、自設的包袱：「年紀一到，就會慢慢諗，自己幾時會死？你本來唔係太介意，但見到身邊嘅人，突然出事，或者忽然驗身，你就開始慢慢走上嗰個軌道。」Chris表示同意：「你咁上下年紀啲嘢就嚟㗎啦，例如血壓高、膽固醇高，咦，開始夠鐘啦喎。」二人以前即便是開show前都可以玩到通宵達旦，「幾罐可樂就咁飲」，現在不可以了，「一個禮拜前要戴定口罩啦！」

肉體儘管會老，但思想可以不老。祝福各位的心靈都可以青春常駐、保持野性。