世界衛生組織日前的官方公布，正式為世紀疫情劃上句號；世界全面復常之際，文化藝術圈子都頓時熱鬧起來，受到藝術家和藝團創作力大反彈的帶動，大小規模、不同類型的節目多如恆河之沙，重返闊別多時的劇院劇場，觀眾難免覺得眼花繚亂，甚至面臨選擇困難，如是者，不妨記著一個名字：Dance Reflections藝術節—一項既國際又在地的藝術盛事，結合了現場演出、電影放映、藝術研究、工作坊、分享會等等多元形式，付費免費兩者皆有，穿梭於傳統場地和嶄新空間，成就出一道又一道的美麗風景。 對於香港觀眾來說，Dance Reflections可能仍然是較陌生的名字，但在世界藝壇之上，這個平台默默地在做很多有關創作、傳承及教育等工作，大力支持現代和當代舞藝術家和藝團，創作足印遍佈全球。2020年起，Dance Reflections於世界各地大力推動舞蹈文化發展，2022年在倫敦首辦藝術節，今年則與法國五月藝術節合作將整個舞蹈盛會移師香港舉行，一連三個周末在港九新界各處呈獻一系列精彩活動，一方面奠定了這個亞洲國際都會在世界藝術發展上的地位，另一方面為香港觀眾帶來了看盡大師風采的寶貴機會。 今次來港參與的七個藝術單位皆是國際藝壇上赫赫有名的名字，包括Christian Rizzo、Alessandro Sciarroni，以及Gisèle Vienne等等，其中揭幕之作《Crowd》正是出自Gisèle Vienne之手，聚焦於個體之間的互動如何受到慾望和權力等等影響，創作團隊將舞台化成沙灘，男女老幼齊齊狂情狂歌起舞，音樂上不但節拍強勁，而且聲量巨大，觀眾彷彿一同來到派對現場，然而群眾動態卻是極其緩慢，與一般影視作品中的派對模樣毫不相似：在一種甚至慢於公園太極的肢體節奏中，觀眾不但沒有感到沉悶，而且觀看得更加仔細、想像得更加遼闊，實在有賴於劇場內時間流逝的種種扭曲。首演當晚所見，不論是主創人員的巧思妙想，抑或是演出者對肢體的精準控制，都讓現場觀眾留下深刻印象，完場時紛紛報以雷動掌聲。 緊接登場還有很多豐富而多彩的舞蹈節目，Ola Maciejewska會與西方舞蹈傳奇人物Loie Fuller開展一段跨時空對話，前者一方面將後者經典舞作《Serpentine Dance》帶到博物館場域重現於觀眾眼前，《Loïe Fuller: Research》運用上獨特方式窺看舞蹈歷史的發展、傳承及演化，另一方面Ola Maciejewska再以《Serpentine Dance》為題創作出《Bomby x Mori》，在劇院環境中直面這位充滿爭議性的人物，探視其自身矛盾和內心呼聲，一套作品看盡兩位巨擘的創作點滴。 就算對舞蹈大師認識有限，對舞蹈歷史或許都不太好奇，今次藝術節仍有很多其他不同類型節目可供選擇，Alessandro Sciarroni在意大利民俗舞中汲取靈感創作出《Save the last dance for me》，單看作品名稱已經非常浪漫，讓人富有想像空間，該種傳統舞蹈可以追溯至1900年代初，本身是與求愛有關，經歷了高低起伏的發展階段而幾乎失傳，除了雙人舞演出，Alessandro Sciarroni更特別設計了一系列工作坊，讓公眾人士親身體驗這種曾經廣受歡迎的民間傳統，不但有趣好玩，而且甚有意義。 疫情時代，不少人都多加思考人類和環境的種種相處及互動，以至往後採取怎樣的生活態度，Rachid Ouramdane集結了一眾擅長空中藝術的創作人和極限運動員，在戶外進行一場別開生面、緊張刺激的現場演出《Les Traceurs》，讓人重新審視和理解這些固有景觀，就算沒有任何習舞賞舞經驗，觀眾仍然能夠感受到演出者豐富的情感交流，並為其驚人的肢體語言讚嘆不已，適合一家大小、男女老幼齊齊體驗。 不論是無舞不歡的狂迷，抑或是初入舞壇的新手，甚至是平日從未跳舞看舞的著羅觀眾， Dance Reflections藝術節都會為你提供與舞蹈結緣的絕佳切入點， Let’s dance, let’s reflect, let’s go Dance Reflections!

一連多天的長假期，香港到處都人頭湧湧，其中包括香港迪士尼樂園等著名景點更是擠得水洩不通，有朋友上周末一家四口到訪樂園，基本上每一款機動遊戲、每一間餐廳食肆、每一個演出節目都要大排長龍，其中樂園最新推出的限定版劇場表演「StellaLou夢想起舞吧」，當日的輪候時間更加達到兩小時，儘管苦候多時，但是朋友一家入場觀賞後都是讚口不絕，大呼值得。 劇場表演一向都是樂園的拿手好戲，其中《獅子王慶典》更是多年來歷久常新的熱門節目，一直保持極高水準，相信絕大部分到過樂園的遊客都有看過（甚至不只一次），樂園最近更加聯手香港旗艦藝團香港芭蕾舞團合力呈獻「StellaLou夢想起舞吧」，將StellaLou的追夢歷程放上舞台，由努力練習、克服考驗，到實現夢想，觀眾都有機會一一見證，過程中好友們Duffy、LinaBell與Gelatoni亦會沿途相伴，互勉同行。 迪士尼與港芭本身都是表演製作專家，今次兩大高手合作，可以說是集兩家之大成：演出既秉承了迪士尼劇場敘事結構清晰、節奏明快的優點，又結集了港芭極高水平的專業編舞技藝，讓「StellaLou夢想起舞吧」成為娛樂性與藝術性兼備的作品，觀眾一方面可以追蹤著主人翁的尋夢故事，一方面能夠欣賞到專業表演者的動人舞姿。今次合作前後歷經超過一年時間，包括原創主題曲、服裝、佈景及編舞設計等等，均是兩團人員的精心創作，港芭藝術總監衛承天（Septime Webre）形容，兩個團隊絕對是一拍即合，「StellaLou的夢想就是舞者的夢想：從小開始，多次跌倒，然後多次起來，繼續努力追尋目標，因此對於我們來說，很易取得共鳴。」「StellaLou夢想起舞吧」在本周五六日還有最後三日演期，每日演出四至五場，不論是迪士尼或港芭的粉絲，抑或是對藝術有熱情的追夢者，同樣值得留意。

當通關安排都大致完全打通，香港社會都可以話係真正復常，於是乎近日走到街上，大家都可能開始覺得人頭湧湧，有啲返到以前旺區經常出現人車爭路嘅盛況，同時戲院又好、劇場又好，紅館更加係唔駛講，基本上唔同嘅演出都係場場爆滿，演出長做長有，其中近日最爆紅，買飛買到最多怨氣嘅可能就係「神神聯手」嘅《愛我別走》，雖然票務系統今次係相對暢順，唔駛由朝到晚「321」倒數，或者全日手動F5，但係當你見到自己個籌係排到十幾萬、廿幾萬，甚至六十幾萬，其實都係同樣萬念俱灰，繼續嘆句「睇場騷姐」。 《愛我別走》之爆，絕對不難理解，就算咩都唔計，單係一個「子華神」已經夠晒號召力，適逢佢本尊呢排都係紅運當頭，繼《飯戲攻心》後，另一擔大旗之作《毒舌大狀》繼續大破紀錄，就算明明係沉重而認真嘅正片片種，放喺農曆新年合家歡檔期一樣遇神殺神、再闖高峰；就算坊間偶有評論指電影「只係爽片一套」，以至部分法庭情節「離地」，結局放諸香港現今社會實況，更加似係睇緊「科幻片」，一樣無礙票房屢創新高嘅凌厲走勢，於是，部分觀眾睇完林涼水都仲未夠喉，想走入劇場睇埋黃子華去做一個同Time Traveler有關嘅舞台劇，都係情理之中、自然不過。 同時，香港劇場其實都好多元同繽紛，除咗《愛我別走》之外，仲有好多其他有趣表演節目可以選擇，《各位起筷》就係其中之一；不過，有言在先，嚟緊你睇到嘅並唔係一篇推銷Sell飛廣告文，事關截至開筆呢刻，一連16場演出嘅門票已經全部售罄，就算依家你想立即「補飛」購票入場基本都係無咩可能，不過睇完篇文至少你有機會認識多啲本地創作人同佢哋嘅作品，下次可能無咁後知後覺。 言歸正傳，《各位起筷》係由四位香港演藝學院紅褲子出身嘅演員聯手製作：麥沛東（麥東）、巢嘉倫（阿巢）、陳嘉威（Donald）同梁嘉進（Eric）；喺普羅觀眾眼中，麥東應該係最為人熟悉嘅，早少少時間上演嘅《媽媽的神奇小子》，佢係入面其中一位神奇隊友；呢一排叫好叫座嘅《正義迴廊》之中，佢係叫人「屈我啦，屈我啦！」嘅唐文奇，其他三位同麥東份屬同屆同學，功底紮實不在話下，同時四人早喺學校已經非常投緣，畢業多年之後始終堅持一齊搞一台戲，台上台下嘅默契都應該唔駛擔心。 功底扎實同有晒默契係一回事，作品好唔好睇又係另一回事，仲要睇番好多因素：「受惠於」疫情，佢哋有長達兩年時間去認真籌備今次製作，單係劇本都寫咗兩個截然不同嘅版本，呼應番時代嘅變遷，其中執筆嘅鄭國偉係非常資深嘅編劇，作品早已獲得不同殊榮，其中《最後晚餐》就以黑色幽默手法寫出低下階層喺生活中嘅掙扎，精準有力；至於執行導演一職就由新銳盧宜敬擔任，雖然佢前年先啱啱喺香港演藝學院畢業，但係已經憑住畢業作品《金龍》獲得校內傑出導演獎，並且同時獲香港舞台劇獎最佳導演（喜劇／鬧劇）同香港小劇場獎最佳導演嘅提名，令人眼前一亮，值得持續留意。 單喺牌面上睇，已經完全理解就算沒有鋪天蓋地宣傳，《各位起筷》仍然可以收穫一票難求嘅佳績，所以睇緊篇文嘅你，今次走寶都唔緊要，下次帶眼識貨就好。

防疫措施（接近）紛紛放寬，出入境安排（接近）全面打通，由個別市民到整個城市，一下子都活潑起嚟，講起活力，其中有兩個界別係絕對不能不提，電影同戲劇：一系列老中青導演接力推出叫好叫座作品，包括《正義迴廊》、《窄路微塵》同《十九歲的我》等等，令到戲院除咗荷里活大片同救世英雄電影之後，仲有更多多元選擇；劇場方面亦都一樣，一連串話劇都錄得滿堂紅嘅佳績，例如《最後禮物》、《我們最快樂》同《短暫的婚姻》，值得留意嘅係就連一啲平日唔太活躍於劇場嘅朋友，佢哋都會出力撲飛，非常熱鬧。 細心嘅觀眾或者都留意到，上述三套作品都係出自同一位劇作家莊梅岩嘅手筆，難怪最近有業界朋友笑言：「好似靠佢一個人撐起半個劇界咁」，三個作品各具特色，其中上個禮拜先啱啱圓滿落幕嘅《短暫的婚姻》，描繪嘅就係一段又一段由信任、脆弱同罪惡感交纏而成嘅親密關係，當中唔少人物性格嘅刻劃、故事情節嘅建立，以至係對白台詞嘅書寫，同台下觀眾嘅當下生活，都有或多或少嘅共鳴感通，難怪作品自一開始嘅劇本出版，後來發展成電視短劇，到2019年首次登上大舞台，每一個模樣都獲得外界相當不錯嘅回響，直至三年幾之後今次嘅重演，一連xx場都係一票難求，十分誇張。 不過，更加誇張嘅搶飛血戰可能都仲未發生，事關「撐起半邊天」嘅莊梅岩即將會有全新作品面世，更加更加誇張嘅係今次節目網羅咗兩大神級人馬擔綱演出，二人先後同莊梅岩合作結緣，分別係早前喺《最後禮物》飾演吊兒郎當大佬嘅「子華神」黃子華同啱啱喺《短暫的婚姻》扮演不忠渣男律師嘅「林狗」林海峰，當「子華神」遇上「林狗」，就算劇情大綱未有，甚至連劇名都未見，早前單係一張只有兩個男人背影嘅宣傳照片見街，已經觸動咗萬千劇迷嘅神經，紛紛開始求票，或者提早放負：「呢個陣容咪駛旨意會買到飛。」 個人口味嚟講，我都未必完全享受兩位男神嘅每一次「演出」，畢竟二人個人特色超級強勁，要喺本色演繹之下再搵其他看點，有時都唔係咁易。於是乎，不論係血腥三級片《正義迴廊》嘅重犯辯護大律師，抑或係愛情悲劇《短暫的婚姻》嘅名利雙收事務律師，林狗本人嘅聰慧靈巧總係處處可見；同樣地，《飯戲攻心》同《最後禮物》中嘅兩個大佬，一個顧家有愛、一個帶恨離家，角色設定截然不同，落到子華神手上，好一些過去喺其他演出存在過嘅質感，又好似總係隱隱地滲咗喺骨髓入面，當然，鍾意嘅就會好鍾意。 然而，不論口味係點，呢兩個人喺舞台上嘅魅力相信都係無庸置疑，難怪就算到目前為止所有宣傳仍然無講過套劇係講乜做乜，觀眾們都已經愁緊點樣撲飛；由此看來，今次嘅劇名應該都改得相當準確，觀眾有時都係非常盲目：《愛我別走》。

等了又等之下，香港終於終於真·復常，除咗市民積極籌備環遊世界，待興已久嘅各行各業亦都磨拳擦掌，積極再同世界接軌：旅遊業、零售業、飲食業、航空業紛紛準備好再次迎接全球旅客；保險、銀行，以及資產管理等金融服務機關努力鑽研大灣區，以及亞洲區嘅人才錢財互聯互通；話劇、舞蹈、音樂等等相當重視跨文化跨時空交流嘅表演藝術行業，亦都即時重新連繫世界各地伙伴，策劃包括演出同創作等不同合作。除咗走出去同人交流，表演藝術行業目前亦都正喺度醞釀緊一個超級項目，希望邀請到包括大灣區、兩岸各地、亞洲區內，以至歐美等地創作人、藝術家同製作人一齊嚟到香港，更深入地認識本地藝術，進一步商談不同合作，呢件大事就係「香港演藝博覽會」（博覽會）。 話說喺2022年年頭，特區政府宣布咗撥款四千二百萬元舉辦首屆專為表演藝術界別而設嘅博覽會，透過包括展覽推介、座談、專題討論、表演同交易等一連串嘅活動，展示本地、內地，以至外地頂尖表演藝術家同團體嘅作品，根據官方提供嘅資料，博覽會嘅目的就係「幫助內地和香港傑出的表演藝術走向國際，同時也促進他們與外地優秀的表演藝術家和團體交流。」據了解，有關當局喺過去一段時間正全力推動事件發生，最近終於敲定博覽會最快會喺2024年嘅第4季舉行，局方代表亦已先後走訪世界各地，向大大小小嘅表演藝術博覽會主辦單位取經，並且研究兩地合作嘅可能，例如攜手呈獻跨國巡迴演出等等。 對於業界嚟講，博覽會提供咗一個一站式嘅平台，讓行家們有一個密切接觸嘅機會，去做包括藝術創作上嘅交流，或者係節目層面上嘅買賣，形式上有啲似工展會同美食展，分別係主體唔會係「一蚊鮑魚」同「糧油套裝」，而係香港別具特色嘅演藝作品同創作單位；部分業界人士坦言，博覽會暫時都係只聞樓梯響，仲未聽到太多具體細節，都好期望主辦單位早啲同多啲去同業界交流，聽多啲佢哋嘅意見，令博覽會嘅花費用得其所，最後真係惠及到行業上下。 咁博覽會同普羅觀眾又有無關嘅呢？有！根據當局初步構思，博覽會亦都唔係純粹嘅業界活動，當中至少演出部分係會向公眾開放，換言之，到時就會有一系列高質素嘅本地同海外節目密集上演，好似一年一度嘅藝術節一樣；事實上，今年本地嘅演藝市道都係非常唔錯，包括早前圓滿落幕嘅《最後禮物》同現正火熱上演嘅《短暫的婚姻》，全部都係叫好叫座，一票難求，2024年嘅博覽會延唔延續到呢一股撲飛入場嘅熱潮呢，到時就要拭目以待。

香港嘅出入境政策終於終於都復常，加上節日氣氛又正急速醞釀中，而且唔少港人都屈住太耐太耐，於是近日Facebook、IG所見，唔少人都前後腳「返咗鄉下」—去咗日本旅行，甚至短短幾個星期已經去完再去；話說11月初都快閃遊咗一轉日本橫濱，為嘅係參加當地一年一度嘅表演藝術會議Yokohama International Performing Arts Meeting 2022 (YPAM2022)，跟番貼亞洲區內演藝業界嘅脈搏，同嚟自區內區外行家交流對話，但喺重溫呢件國際盛事嘅所見所聞之前，有一單意外驚喜係要搶閘拎出嚟分享先。 話說橫濱唔算係好主流嘅旅遊熱點，就算旅客會去都未必會留太長時間，甚至Day trip往返東京或者其他城市就算，然而橫濱當然都有佢自身嘅特色同魅力，其中近期一個令人不得不留意嘅就係「橫濱（移動）高達基地」，基本上當大家喺Google搜尋「橫濱」，頭一二三個熱門結果已經係呢個項目；本身其實並唔係高達迷，都無任何特殊情意結，本住嘅係「橫濱好似無咩景點，有咪睇下」嘅到此一遊心態，橫濱市中心唔算好大，基地位於海旁，由於高達身高本身就高達六層樓，只要抬頭一望，自然就會搵到。 一入場撞正「移動高達」嘅光影匯演，拿拿聲舉機影相拍片，可能平日Marvel向嘅電影實在睇得太多，由世界各地打到不同宇宙，人魔神等三界、五行、六道通通都打成一片，「震撼感」同我都開始漸行漸遠，眼見呢座昂藏18公尺嘅高達接連做出大小不同動作，都僅僅係有種「都唔錯」嘅反應；正當懷疑緊呢個高達橫濱基地旅程「咁就完咗㗎喇？」之際，曙光就出現咗—一入場就受到光影匯演所牽引，忽略咗入口旁邊原來有個故事館，深入淺出講番成個「移動高達」項目嘅心路歷程。 第一幅展板已經開宗明義講到：就算以日本依家擁有嘅科技水平，要令呢個Size嘅機械人郁得到，都絕對唔係容易嘅事，零件裝嵌、機電工程、程式編寫等等，牽涉幾多軟件硬件專家、耗費幾多心血時間精神，係要傾盡全國之力先有今時今日成果，至此我先赫然發現剛才果種「都唔錯」係好錯，係幾咁有眼不識泰山；除咗技術層面解構，故事館仲承載住一代又一代日本人對高達嘅深厚感情，包括從孩提時代開始睇住高達成長，至入學時決意修讀相關學科嘅工程人員，或者由細到大一屋都係高達模型，到今日有份一手一腳砌成呢座1:1實物原大（仲要識郁）機動戰士嘅台前幕後，聽住佢哋不無激動嘅分享，充份感受到追尋夢想賦予咗人類嘅重大力量。 當聽到「移動高達」呢個項目概念，當然有人興奮莫名、期待至極，同時有人不明所以、疑問連連：點解要令高達識郁？「世上仍然有好多事被視為『無可能』，係咪？我哋唔係要將『可能』嘅事做完又做，而係要做前所未有嘅嘗試，咁樣至係『挑戰』。」喺後疫情嘅時代，整個世界都變咗好多，做人處世出現咗有好多新嘅挑戰， 「移動高達」團隊呢種「不可能而能之」嘅信念，絕對值得借用嚟互勉一番，支持住大家繼續一齊行。

世界盃嘅戰火短暫熄滅，球迷們都可以抖抖氣同休息一下，以至花啲時間做下睇波以外嘅事，例如入下劇場接觸下藝術創作；話說呢排本地劇壇可以話係盛事連連，其中文化中心更加成為大小劇迷，以及劇界中人非到不可之地，事關兩大經典戲寶分別喺劇場同大劇院同期上演：《十二怒漢》結集咗本港12位藝術同行政總監聯手演出，《天下第一樓》更加誠邀到劇帝謝君豪重返舞台，兩大節目頓成一時佳話。 近期非常火熱嘅電影《正義迴廊》以香港多年前嘅弒親真人真事為創作主軸，其中陪審團嘅角色、功能同運作就係焦點之一；《十二怒漢》同樣係法庭戲，而且更加徹底由頭到尾都係12位陪審員退庭商議嘅過程，不論係對白嘅刻畫、角色嘅互動、情節嘅推演，都引起好多有關法治精神同社會公義嘅反思。一台戲12位演員，人人都有戲演、個個都係主角，而主辦單位香港戲劇協會更加破天荒邀請到12名本地藝團嘅現任同前任總監同台演出，呢一種台慶式「晒冷」嘅手法，喺市場營銷上極具效用，於是《十二怒漢》票房一開已經賣個滿堂紅，加場再加企座，都仍然係一票難求。 《天下第一樓》則係香港話劇團前駐團編劇何冀平嘅成名作，曾經獲得包括文化部「文華獎」同中國戲劇文學「曹禺獎」等多項殊榮，劇作1988年喺北京人民藝術劇院首演後喺香港、日本、南韓、新加坡、台灣，以至歐美等全球各地演出，更曾改編成電視劇，今次再度重回香港舞台，成功邀請到話劇團前首席演員謝君豪領銜主演，呢一位金馬獎影帝近年活躍於電影世界，今次再踏台板，同樣令到一眾劇迷期待不已；《天下第一樓》嘅故事環繞住名噪京城嘅烤鴨老字號「福聚德」，老掌櫃因病退居幕後，但係兩名少東終日不務正業，好彩得到外援拔刀相助，先至喺幾年內將老字號扭虧為盈，可惜兩位富二代不憤對方功高蓋主，誓要一爭長短，天下再無寧日。 劇壇盛事一浪接一浪，《十二怒漢》啱啱先圓滿結束，《天下第一樓》就正進入演期最後一周，《飯戲攻心》踏台版嘅優先訂飛都已經喺一片叫好叫座嘅呼聲中結束咗，挾住香港最賣座喜劇嘅美名，唔少觀眾都好奇將呢個劇本搬上舞台，到底會係點樣？雖然電影版嘅經典6人組合只留一人，但係包括周國賢同梁仲恆等新成員近年喺舞台同電影等唔同領域都大放異彩，同樣讓人非常期待。