曾幾何時，三五知己總愛聚在一起拼湊將來，你一言我一語的說着不如開間書店、咖啡廳，可無數天馬行空的想法都遺落在過去。有7個因不同原因在不同時間搬入長洲的朋友，希望能在小島上擁有一個「竇」的想法一直縈繞，她們常常會聊說：「如果有個舖頭會做乜？」一天如常的在聚會裏天南地北的說，發現長洲原來沒有一間書店，各自又對藝文有興趣，碰巧那時島上還有一個適合的舖位，「不如開書店啦！」就這樣，長洲在21年9月便有了「渡日書店」。

「渡就係由一個點去一個點嘅意思，就好似啲人一定係搭船先會嚟到呢個地方。」接受訪問的其中一位店長Solam說：「而渡日就好似渡過一啲日子，（當時）成個大環境係有一種比較強烈地多人討論走唔走。」無論如何，希望人們來到這個空間能重新思考如何過日子。

來坐上這艘文字的小船， 聽聽三位店長 —— Solam(SL)、Sim(S)和Vanessa(V)與長洲這座小島的故事，或許就會想給自己一個小假期，從每天忙碌的工作中逃離，好好的過一天。

文字：Hoiyan @seamouse_hoiyan
攝影、設計：Owen @wai.ho.98

｜她們和小島
為甚麼要從方便的鬧市，搬入看似與城市隔絕的島嶼？三人都笑言一切只是水到渠成，並沒有特別計劃，S是和男朋友一起搬到長洲，SL則因為長洲朋友家附近剛好招租，便很快下了決定入住，而V則是接租朋友單位，她說：「以前去過兩個唔同地方，一個係威尼斯，另一個就係瀨戶內海藝術祭，我都幾鍾意搭船。」

SL是獨立設計師，S初入島時也是自由工作者，後來轉職為營銷傳播職員，而V則是任職藝術行政的工作。後者二人在九龍工作，每天都需要長途跋涉的坐船又轉車，V本來就很會享受船上時光：「聽下歌睇下書，唔會覺得時間特別耐。」然而，S覺得距離雖遠，但上船時就像半隻腳已踏進家門，況且放假能留在島上真的很放鬆，「島仔細細，但同nature真係超接近，可能真係5分鐘路程就可以跳落水，想行個山都係講緊10幾20分鐘，超good！」一個長洲，就有不同場景，熱鬧、寧靜、山和海，閒時在島上漫無目的地探索，也是島民的一大樂趣。

｜小島和書
探索這件事，有人喜歡以雙腳發現，也有人喜歡在書海中徜徉。與其他獨立書店不同，渡日沒有仔細定位，S說：「都算係雜崩冷啲，好因應我哋每個人嘅認識同興趣去建立呢間舖存在嘅嘢。」小說、散文等文學類作品就正是她所愛，而V就喜歡獨立出版物，所以也收集了不少Zine，也有SL喜愛的繪本，還有其他人喜歡的航海、歷史或童書，甚至是生活用品，處處都充滿不期而遇的驚喜。V補充：「唔係話啲書剩係呢度有得賣，而係我哋每次去旅行，覺得得意嘅都會攞返嚟賣，讀者發現原來有呢啲書，都係一個好嘅encounter。」

「有啲書係同島或者海有關，都唔係話好多，不過都會有。」SL拿出由邱世文爸爸邱東明著的《長洲生活記》、已絕版的《長洲手札》、關於漁民和漁歌的《岸上漁歌》，還有多年前由長洲街坊點點媽媽多年前一人製作的Zine《點兒》，「每一期都係一張紙，用返佢作為本地人的角度去講，譬如長洲太平清醮，又或者係行樓梯的經驗等等。」不說不知道，海傍街的建築若是建高數級，那幾乎可以肯定它是建於70年代或以前，因為那時尚未填海，舖外已是沙地和海，建高是為了防止潮漲或風暴時海水湧進屋內。還有更多有趣的島嶼小故事，躺在店內靜待大家發現，SL說：「有一份係講舖頭貓，好多都已經唔喺度㗎喇，島民睇返啲相就即刻好有回憶，我覺得係一啲出版或者書，最實在嘅意義同價值。」

｜對的人和對的書
每一次有讀者來尋寶，看到店長的選書並帶走，剛好那本是V的書時，她帶着滿足的笑容說：「覺得『嗯！我啲taste都幾好！』，搵到一啲大家share嘅interest。」SL接言：「睇書呢啲嘢好個人，所以我諗點解我哋會莫名其妙興奮，就係覺得我鍾意嘅嘢都有人鍾意。」每件事一體兩面，在這些書遇到對的人之前，也偶爾是店長們甜蜜的掙扎。

「經常都會有呢啲考慮或者掙扎，就是大家會喜歡看啲咩書，或者我們店長自己有啲咩書想推介畀人。」有時可能店長覺得某本書很正，入書後賣出速度不及，最後成為囤貨，S分享經營信念：「我哋有一個『賣一世原則』，可能無啦啦有一日，就會有人買咗一本擺咗好耐的書。」確信書並不是日用品，一定不會貨如輪轉，所以只能把心臟訓練得強大一點。「書真係唔會過期。」SL說，有些書10年後仍會再版，或有讀者突然心血來潮想找回某本舊書，但新書也有它的熱度，「有時候我哋推介的書，未必係依家好hit嘅書，但又會可能因為咁啱之前有些人未遇到過，可以在這裡遇到都是好事。」

｜書店和長洲
三人在島上各自住了4至6年，書店也不知不覺經營了近3年，與這裏的關係也越來越緊密。在渡日，她們遇見了遊客和島民，也慢慢踏出書店的舒適圈，開始舉辦不同緊扣長洲、自然或書本的活動，像邀請了一對住在島上多年，且對雀鳥甚有認識的夫婦開展了「認識長洲家燕：燕子觀察分享會」、跟住繪本認識長洲和中秋燈迷活動，V笑言：「有一個伯伯喺度估晒我哋50題，雖然好似冇乜中。」這一切也不是基於一個甚麼偉大的目標，Sim說：「而係開咗之後慢慢識多咗人，人哋又識下我哋，有啲唔同嘅碰撞之下去產生不同的idea。」才慢慢在「一半有機、一半curate」的情況下生出不同活動。

一切都是無心插柳柳成蔭，SL說：「因為我哋對呢個社區好奇心大咗，有啲活動都會一定是好關長洲事，都係想透過書同埋社區嘅關係有啲連結。」之外，也有被長洲的生活文化衝擊，有島民曾與她們分享兒時運動會逃學經驗，城市人可能會去機舖，但島民卻是穿着體育衫就跳下海游泳。「或者放學會去釣魚。」V說罷引來大家一陣笑，SL回話：「有啲真係會着住校服喺度釣魚，同埋一街都係細路踩單車。」說着說着，好像真的會被島上的氛圍感染，來到書店就能好好的歎書，而非急急的買到目標便離開，像是被調了時差一樣。

｜繼續過日子？
城市的小店一間又一間光榮結業，島上的渡日又會否繼續陪伴大家好好過日子？S說：「最好就冇呢個要結束嘅一日啦。」但世事難料，誰又能預知未來，她說：「但我哋都仲有好多想做嘅嘢未做，做完嗰啲先算囉，我覺得都keep住有嘢想做嘅。」是甚麼？

SL語帶保留：「但係講咗，我驚……」V一矢中的：「唔係，講完我哋就要做！」語畢，耳邊立即傳來三個女生既興奮又緊張的尖叫聲，V續說：「General啲，我哋想試下出版。」最後，SL慎重的指着旁邊的小說，「頭盔一個，我哋唔係出版呢啲，而係一定會同長洲有關嘅Zine或者繪本。」就讓我們一起來期待一下吧！