小時候的你，大概都有想過「我的志願」。可是長大後，你與心目中理想生活的距離差了多遠？

今日故事的主角阿金，血液中流着濃濃的「追星血」。中學時從《勁歌金曲》認識韓星Rain開始掉進韓坑，為了追韓星，她讀韓文，夢想做娛記，近距離和偶像交談。但實現夢想後卻漸漸發現，把追星煲劇變成工作與想像原來有出入。與此同時，她掉進「泰坑」和「BL坑」，又跑去學泰文追星。及後發現，自己已深深愛上泰國這地方。

經過一番掙扎後，她不做記者了，反而在泰國曼谷找了一份比香港人工減半的工作，決心留在這個慢活城市。你可能會問值得嗎？回望20年追星生涯，生命的軌跡由舞台閃爍的星星引領，一步一步尋覓自己心之所向，她這樣為30多年的人生總結，同時勸勉同路人：「追星令我變成記者，令我學一個語言，令我學做應援設計，追星令我變成一個更好嘅人。你知道你嘅星畀咗乜嘢快樂你，就已經好足夠！」

文字：Heidi @heidi.is.strong
設計：Kayan @yipyn

｜追星追到做記者

阿金追星年資已達20年，「小學已經叫媽媽留一蚊畀我抽YES卡，不過嗰陣好單純，只係擁有一件明星產品或者雜誌，我唔覺得嗰啲係追星。」真正讓她開展追星之路的，是Rain。「我好鍾意睇人唱歌跳舞。我唔係睇《浪漫滿屋》入坑，我係睇《勁歌金曲》入坑，哈哈！」

15歲的高中生，雖未財富自由，不能飛到韓國，但因當年紅得如日中天的Rain常常到香港，阿金情願不上學，也會每次到機場接機，連父母也拿她沒轍。在阿金升中五的時候，有次Rain到尖沙咀出席活動，現場很迫，人貼人，「我同Oppa距離好遠。但我見到記者哥哥姐姐唔需要排隊，甚至差唔多活動開始先到現場，仲可以近距離訪問。我見到呢個畫面，我諗，如果我要近距離見到Oppa，似乎我就係要做呢個人？」她遂以浸大傳理為目標，惟會考滑鐵盧。為了讀新聞系，她改到澳洲升學，再到韓國攻讀韓文一年，一心回港後做韓娛記者。

「好好笑嘅係，我讀完後，Rain嗰一年啱啱入伍。不過我覺得唔緊要，我都想做到娛樂記者。」她的第一份工作，便是當年膾炙人口的《YES！》雜誌。

｜完成夢想，然後呢？

就這樣，阿金開始了娛樂記者生涯。做過數間媒體的她，最當紅的韓星，例如「四大天王」金秀賢、李鐘碩、金宇彬、李敏鎬；韓團「Beast」、「B.A.P」、「After School」、「FT Island」等都訪問過了；大型頒獎典禮「MAMA」也採訪過，夠圓滿了吧？「但原來當你將樂趣變成工作，係咪真係一件好事呢？當年追星睇劇，係為咗開心，好放鬆；但當你返呢份工，睇劇係為咗打幾千字稿，呢個就已經變成一個負擔。」

在這段低迷時期，阿金從泰星中得到了新的救贖，「嗰陣返緊上一份工，意外見到泰版《浪漫滿屋》，其實以前都會睇泰國電影，《人妖打排球》、《拳霸》，呢啲好老土嘅。嗰陣心諗，泰版浪漫滿屋係咪好似Tony Jaa咁？你竟然翻拍我Oppa嘅劇，我就睇吓你點！」怎料一開劇，驚為天人，「原來泰仔好靚仔！」

自此之後，阿金開始對泰國影視作品著迷，看過了笑片《我很好…愛死你》後，更是愛上了泰國影星Sunny Suwanmethanont（暱稱P Sun，P即哥哥、姐姐意思），「佢係年紀比較大嘅影帝級，唔係偶像派，所以要搵中字版嘅片比較難。為咗聽得明佢講乜，我都學吓泰文啦！」於是她跑去了工聯會學，但課程進度太快，讀完低中高三個課程，她還是一句泰文都講不出來，「但我覺得自己仲有一團火，想學泰文，又唔知依家份工做緊乜」。終於，在2017年，她內心交戰了數個月，決定裸辭到泰國學泰文，追泰星！

她怎麼也沒料到，人生的走向在此又準備拐一個大彎。

｜從愛上泰星到愛上泰國

阿金第一次在泰國追星是在2018年，她單人匹馬闖入P Sun的電影宣傳活動。看到燈牌後，阿金戰戰兢兢，用英文夾雜破爛的泰文，詢問如何加入Fans Club。有別於其他粉絲傾向「排外」，泰國的P Sun粉絲們反而熱烈歡迎她，「最神奇嘅係，每個粉絲都會有『追星三寶』，一定會有凳仔。追韓星嘅話，佢哋一定唔會理你，企你前面照開摺凳。但追泰星嘅話，有摺凳大多數企後面，矮過你嘅人全部企前面。佢哋會確保全部人都可以見到個星。」

在阿金的眼中，韓星真的是如天上的星星一樣遙遠，大家無論多努力，都永遠不會觸碰到Rain，不會有對話的機會，他更不會記得你是誰。但那天活動完結後，粉絲團的人邀請她參與「點名活動」，介紹她與P Sun面對面交談。「嗰日之後，我不停不停追P Sun，追到佢都認得我呢個人。追泰星，你勤力，起碼你粒星會記得你。但追韓星，我諗你要花五六七八九年，先可以接觸你嘅星，見到你嘅樣。」

有別於某些粉絲們為了搶得有利位置，各不相讓，追泰星卻讓阿金感受到泰國人的友善與熱情。「其實我唔知係咪佛教（國家）問題，但我覺得係社會影響，當你成個社會八成嘅人都好peaceful，會融化到你身邊嘅人。佢哋一下子就會拉你入群組，你就會十幾二十人一齊追星。」

本身自言性格火爆的阿金，在泰國連性格都變得溫和，「我認識好多泰國朋友後，我嘅（怒）火少咗好多。佢哋真係好peaceful，乜都『你先啦』、『一齊啦』，好大愛。」更甚的是，一向覺得在香港只是在努力賺錢「生存」的阿金，在泰國感受到何謂「好好生活」。一切一切，都讓她深深愛上這片土地。

｜熱辣滾燙地浪漫下去

讀完一年泰文後，阿金回港繼續生活。COVID三年未能出國，這段時間她經營自己Youtube，介紹泰劇、泰國文化，又膽粗粗邀請泰星進行線上訪問，再放上自己Youtube頻道。疫情後，她來來回回香港及泰國旅居，但始終未找到一個機會長居泰國。

輾轉到了今年，她終於在泰國找到一份長工。在35歲之齡，她毅然改變人生的航道到泰國定居。基於港泰工資水平差別，現在阿金人工只有過往的一半，雖然與當地人相比是中上水平，但對於現在「Fresh Grad要25K」而言，「我諗你可以形容係，你要跨過自己好大嘅心理障礙」。加上轉行某程度上是遠離了自己年輕時的夢想，記得到職前兩星期，阿金仍不斷問朋友，「我有揀錯嗎？」

去到入職頭兩個禮拜，阿金仍然覺得自己未能適應脫離舒適圈的感覺，正當她覺得自己「係咪好似要放棄」時，泰國人的溫暖和熱情給予了她力量，「泰國職場好warm，好caring。我唔知係咪只係我公司，但起碼我同事、上司對我態度，我以前喺香港打十年工都無呢份溫暖。我從來未試過有一個上司一直問我，點呀？攰唔攰呀？我哋成條team back up你呀。雖然呢份工我唔係好似當初，有一團火，但依家我反而感恩自己有呢個機會，我學習到意想唔到嘅嘢，見到另一個自己，原來我有能力做到呢啲嘢！」

今年，阿金出了一本書——《一個女生泰浪漫》，回顧了自己憑「衝動」而走過的泰國生活及追星生涯。透過這本書，阿金希望能夠帶給大家「想做就做」的勇氣，「因為你唔會知道團火，或者嗰嗰機會第二日仲係咪度。你唔需要同自己講，我下年就做，我下個月就做。你想做，就立刻做啦！」

In ACOO, you can see #ACOOPerson .

#追星 #移居泰國 #泰國生活 #香港人在泰國