地鐵廣告、百貨公司LED大螢幕、巴士座位橫幅以及叮叮（電車）生日應援車，近年粉絲為自家偶像舉辦的宣傳支持活動，既是新奇又充滿創意，這種規模完全突破過去香港追星文化的想像。然而，香港樂迷的瘋狂，還能衝破時空限制——出生於90年代的舒詠晨，人生的三分之二也喜歡着梅艷芳，「我人生第一個、亦都係唯一一個偶像，就係得佢。」舒詠晨為梅經營的專頁近乎每日一篇，分享報章雜誌、影視節目及演出片段，留言區偶爾會釣出徒弟何韻詩，還有其他樂迷分享昔日往事，她說：「如果可以將我偶像帶畀大家嘅快樂，將佢multiply、amplify嘅時候，呢個都係我繼續做落去嘅快樂來源。」在這個小小的網絡空間，彷彿梅艷芳從未離去。

今天是梅艷芳展開宇宙巡迴演唱會的第21年，未來、永遠也是屬於她的芳華絕代。

文字：Hoiyan @seamouse_hoiyan
照片：受訪者照片 @anita.mui_、資料照片來源詳見文末
設計：Owen @wai.ho.98

｜呢個病我係可以打得低
說音樂，就用歌手來劃分年代，舒詠晨屬於陳奕迅、容祖兒和Twins的年代。千禧年互聯網沒現在發達，大部分人聽歌途徑也是信和買碟、電台，不然就是偷偷用Foxy下載音樂。那時候，舒詠晨的音樂口味是承襲父母，「所以細個已經知梅艷芳係邊個，但又冇特別鍾唔鍾意。」真正留意梅艷芳，則是先從張國榮離世後的報道開始，她笑言更曾誤會形影不離的二人是情人。之後，梅艷芳為SARS出心出力，先是籌款後又號召舉行《1：99音樂會》，還有後來梅公布患癌的記者會，當時其態度堅定且自信：「呢個病我係可以打得低，我深信喺好短時間之後，我會好返。」舒詠晨直言被梅的態度煞到：「好型喎！」娛樂新聞總是有梅的報道，舒詠晨把每篇也一一細看，並在不經意間累積着好感，「我應該嗰時開始鍾意佢，佢走嗰朝覺得好唔開心，如果呢個人對自己而言係唔重要嘅話，冇理由會咁唔開心。」

｜梅艷芳所在之處就是舞台
自接觸、了解梅艷芳，舒詠晨就開始無以復加地喜歡上她，甚至謂梅是人生唯一偶像。相比起梅的歌曲、影視作品，舒詠晨最喜歡她的為人：「佢個人真係好inspiring，唔單止有才華，仲有好多嘢睇，呢種感覺係……我覺得暫時係得佢一個畀到我。」

舒詠晨分享，她曾看過一個許冠文的訪問，才知道演藝人協會的發起人之一是梅艷芳。私下，梅會相約甘草演員聚餐、舉辦生日派對，讓他們感覺被重視，「佢做唔係為咗咩回報、光環，呢啲係冇賣報紙㗎嘛。」又有一次，梅在紅館後台等待上台，而螢幕正在播放工作人員名單，她竟然發現少了兩位工作人員的名字。除了同業，梅艷芳也很珍惜每一個粉絲，舒詠晨分享了一些在訪問及粉絲圈中流傳，且為人津津樂道的故事。「有一個fans追咗佢一段日子，要去美國讀書，佢就約個fans去屋企食飯。」又有一次，有粉絲在晚上到片場探班，梅又因為擔心他們獨自歸家，便把粉絲接回家睡一晚。

舞台上，梅艷芳因為工作滿檔，身體已超過負荷，令她總是抱病上台，下台就暈倒，但每場演出也絕不欺場，舒詠晨說：「佢呢種態度從頭到尾都冇變過，所以最後點解佢有病，都夠膽去做呢個演唱會。」那種意志力和對舞台的熱愛，可說是無人能及，「你想做，同你做唔做到係兩件事，但佢真係做到。我成日都覺得唔好話病、頭暈身㷫，剩係嚟M唔夠瞓已經好多嘢做唔到，何況重病？」讓梅艷芳閃亮的，不只是她用生命作養份的演出，還有真誠，「咁多次嘅呢啲故事，係最illustrate到佢係點樣嘅一個人。」

｜與梅艷芳最接近的距離
「我識佢（梅）全部都係靠啲二三四五六七手嘅資料，純粹係呢啲碎片，寫返自己睇完一輪嘅理解。」從舒詠晨的分享，即使不是生在梅艷芳年代的人，也能知道梅艷芳會為了挑選衣服而遲到、因要捉弄朋友而不惜認真扮醜、敢言且玩得，看見梅有趣又充滿人味的另一面。舒詠晨也會整合梅的演出、造型、工作花絮故事和作品賞析，細看每一個帖文就像是梅艷芳的日記。而這，亦得到認證，包括梅的徒弟何韻詩，還有既是良知亦是益友的劉培基。

去年，香港文化博物館曾舉辦一個為期大半年的梅艷芳展覽，同時傳出殺館消息，舒詠晨便寫下文章表達感受，卻意外引來劉培基的關注。「佢打畀我，哇！我真係手都震，但我都故作鎮定。」重新憶述這通電話時，舒詠晨的聲音仍透露着緊張興奮的情緒：「劉培基同我講，從來都冇打過電話畀梅艷芳fans，有諗過我係咪識得佢。」那些剖析和講解的文字，就像舒詠晨完全明白梅當下的狀態和情緒，她直言聽到時感動得盈眶：「覺得有少少好似梅艷芳隔住時空，透過佢最close嘅摯友同我講呢番說話，又好似冥冥之中，佢將我哋呢班愛佢嘅人連繫埋一齊，好神奇。」

｜遺憾與最純粹的快樂
喜歡梅艷芳，與喜歡其他歌手之間的差別，在於體驗上的落差，舒詠晨說：「遺憾地我係無辦法experience到追星嘅快樂。」早在數年前，電影節重新上映梅的電影，入場後舒詠晨才驚覺：「原來我喺正式一間戲院睇你嘅電影，not even真人喎，其實我都未試過。」她也曾問自己，為甚麼要對這個人投入這麼多情感，兜兜轉轉想了又想，喜歡一個人真的可以沒有原因。

那麼，如果人生沒有了梅艷芳呢？舒詠晨坦言應該沒有差別，「都係咁過，但我覺得會冇咗好多快樂。」對舒詠晨而言，雖然偶像不是楷模，但偶爾梅說過的話和行動，的確會讓她得到一點力量，「我好記得佢講過『只要有信心無難事』，係佢cancer開最後一次演唱會講嘅。有任何難嘅嘢，我個腦就會響起呢句說話，唔好怕，做咗先囉。」喜歡梅艷芳，沒有冠冕堂皇的說辭，只有最純粹的快樂，「活到咁上下年紀，發覺人生好多開心都有代價，難得有呢樣嘢可以好單純咁去enjoy。」

永遠不會再更新的歌單，沒有新上映的電影，這些讓粉絲一聽再聽、一看再看的作品，都是不能取代的存在。

｜The Show Must Go On．Life Must Go On
梅艷芳的一生充滿崎嶇，兒時家中環境拮据，4歲便跟着姐姐梅愛芳到處唱歌幫補家計，導致她沒機會好好讀書，長大後亦曾為此感到自卑。成年後，梅在無綫電視與華星唱片合辦的第一屆新秀歌唱大賽中勝出，看似亮麗的活在聚光燈與掌聲之下，但其實埋藏在大姐大直率性格下的她，一直期盼着找到一個能長相廝守的伴侶，舒詠晨說：「我理解佢嘅人生觀可能係忠於自己，佢嘅掙扎、成功、遺憾、無論開唔開心，佢都可以好誠實咁面對，我覺得呢種誠實係最難，但係佢做得到。」所以，最後梅決定嫁給舞台，放下心中執着，「面對自己嘅出身唔好、得唔到嘅伴侶、遺憾，我覺得呢樣嘢係最難。」

但眼前的挑戰，從不是阻礙梅艷芳付出的藉口，她把家人、朋友及後輩，通通視為自己的責任，舒詠晨說：「佢成個人生裏面冇埋怨，冇自暴自棄，繼續用自己得到嘅名利、尊敬、愛戴去give back。」作為香港女兒，梅艷芳在香港每一個艱難時刻也身先士卒，像是六四和SARS時，她樂於幫助，甚至主動領導眾人，因為她覺得這是其份內事，種種事跡讓舒詠晨感受到她梅強大的溫柔：「佢embody咗一種好似好難喺公眾人物身上見到嘅愛，對呢個地方嘅愛、同埋對呢個地方啲人嘅愛。」所以這麼多年後，她仍是大家很寵愛、很寵溺的女兒。

若今天還在，梅艷芳會怎樣做？「我覺得佢係嗰種會繼續做好自己份內事嘅人。喺艱難嘅時候，佢可能會鼓勵大家繼續做好自己，做好你自己嘅份內事，做好你嘅責任。」

——————–
In ACOO, you can see #ACOOPerson.

翻拍圖片來源：
1/ 1983《白之花嫁》日本發行七吋黑膠封套、1987-88紅館演唱會票尾、1983《強吻之前》日本發行七吋黑膠封套
2/ 紅館演唱會外購買照片
3/ 《大眾電視 T.V. NEWS WEEKLY》第700期封面、紅館演唱會外購買照片
4/ 紅館演唱會外購買照片
5/ 紅館演唱會外購買照片
7/ 紅館演唱會外購買照片
8/ 1983《白之花嫁》日本發行七吋黑膠封套
9/ 《烈焰紅唇》黑膠唱片封套、報紙專欄
10/ 紅館演唱會外購買照片